بەيجىڭدە ەلشى ايەلدەر «تۇساۋكەسەر» ءراسىمىن وتكىزدى - فوتو

بەيجىڭ. قازاقپارات - قىتايداعى ق ر ەلشىلىگى ناۋرىز مەيرامى قارساڭىندا بەيجىڭدە اككرەديتتەلگەن ەلشى ايەلدەر مەن ديپلوماتيالىق وكىلدىك باسشىلارىنىڭ ايەلدەرىنە ارنالعان قابىلداۋ ۇيىمداستىردى، دەپ حابارلايدى «قازاقپارات» ح ا ا قىتايداعى مەنشىكتى ءتىلشىسى.

ق ح ر- داعى ق ر ەلشىسىنىڭ جۇبايى ءاليا نۇرىشەۆا قوناقتارعا كوكتەمگى ناۋرىز مەرەكەسىنىڭ تاريحى مەن ءمان-ماعىناسىن ايتىپ بەردى.

قوناقتار قازاقستان جانە استانادا وتەتىن «ەكسپو-2017» كورمەسى تۋرالى فيلمدەردى تاماشالاپ، كوشپەندىلەر تىرشىلىگىمەن تانىس بولدى، قازاقتىڭ «تۇساۋكەسەر» ءداستۇرىن كوردى. ق ح ر- داعى قىرعىزستان ەلشىسى قانايىم باقتىعۇلوۆا، قىتايداعى تۇركىمەنستان ەلشىسى چينار رۋستاموۆا جانە ءاليا نۇرىشەۆا كىشكەنتاي الان، ەرالى جانە ەرسۇلتانداردىڭ تۇساۋىن كەستى. شاراعا جينالعاندار ءراسىمدى ۇلكەن قىزىعۋشىلىقپەن باقىلادى. مەرەكە قوناقتارى قازاقستان تۋرالى فوتوكورمە مەن ورتالىق ازيا ەلدەرىنىڭ ماتەريالدىق جانە رۋحاني زاتتارى بەينەلەنگەن ستەندتەردى قاراپ شىقتى. ناۋرىز كوجە، باۋىرساق، مانتى، پالاۋ سەكىلدى قازاقستان، تۇركىمەنستان جانە وزگە دە ورتالىقازيالىق رەسپۋبليكالاردىڭ ۇلتتىق تاعامدارىنان ءدام تاتتى. «ءبارىن جاقسى ويلاستىرعان، تانىستىردى، كورسەتتى. مەنىڭ ويىمشا، بۇگىن الەمنىڭ تۇكپىر- تۇكپىرىنەن جينالعان ايەلدەر قازاقستان مەن وندا وتەتىن ەكسپو كورمەسى جايلى ءبىراز ماعلۇماتپەن تانىستى. ناۋرىز كوجەدەن ءدام تاتقان قوناقتار قازاق تاعامدارىنا ءتانتى بولدى»، - دەدى قىتايداعى ليتۆا ەلشىسى يننا مارچۋليونيتە.

قىتايداعى سۋرينام رەسپۋبليكاسى ەلشىسىنىڭ جۇبايى وليۆەرا پيناس ءبىراز جىلدان بەرى قازاق مادەنيەتىنە قىزىعۋشىلىق تانىتىپ جۇرگەنىن، جاقىن ارادا كۇيەۋىمەن قازاقستانعا بارۋعا دايىندالىپ جۇرگەنىن جەتكىزدى.