شىمكەنتتە جاڭا «ەرلىك» فيلمى جارىق كوردى
وڭتۇستىك قازاقستان وبلىسى اكىمدىگىنىڭ تاپسىرىسى بويىنشا تۇسىرىلگەن تۋىندىنى كورەرمەنگە جەرگىلىكتى «ساق» كينوستۋدياسى ۇسىندى، دەپ حابارلايدى قازاقپارات ح ا ا ءتىلشىسى. جاستاردىڭ بويىندا ەلىنە، جەرىنە دەگەن سۇيىسپەنشىلىكتى دامىتۋ يدەياسىمەن تۇسىرىلگەن فيلمدى كورۋگە قالا جۇرتشىلىعىمەن قاتار وبلىس اكىمى جانسەيىت تۇيمەبايەۆ، بەلگىلى قالامگەرلەر مارحابات بايعۇت، نۇرعالي وراز باستاعان توپ كەلىپ تاشامالادى.
تولىق مەتراجدى كينوتۋىندىدا وڭتۇستىكتىڭ اسەم تابيعاتى كورسەتىلىپ، ىشكى تۋريستىك الەۋەتى ناسيحاتتالعان.
ال مازمۇنى «سايرام-وگەم» ۇلتتىق پاركىندە جۇمىس ىستەيتىن ينسپەكتور- يەگەر بولات پەن ونىڭ بالاسى ەربولدىڭ اراسىندا ءوربيدى. نەگىزگى يدەيا كەز كەلگەن اكە بالاسىنىڭ باقىتى ءۇشىن باسىن بايگەگە تىگەدى دەگەنگە سايادى.
اقىلدى ۇلدىڭ دا ءوز پايىم-پاراساتى، ۇستانىمى بار. قارا باسىنىڭ قامىن ويلاماي، جۇرت ءۇشىن جۇمىلا ەڭبەك ەتەدى. وتانعا وپاسىزدىق جاسامايدى. سەناري اۆتورى وسىلايشا تۇرمىس تۇيتكىلدەرىنەن بولەك، رۋحانياتتى دا الدىڭعى قاتارعا شىعارۋدى كوزدەگەن. فيلم اۆتورلارى «ەرلىكتىڭ» جاستار جۇرەگىندە تابيعاتقا دەگەن سۇيىسپەنشىلىك پەن جاناشىرلىقتى وياتادى دەپ سەنەدى.
ەسكە سالايىق، «ساق» كينوستۋدياسى بۇعان دەيىن «قوشقار مەن تەكە»، «تومپاق» انيماتسيالىق فيلمدەرىمەن تانىمال بولعان.
اۆتور: اينۇر اقبايەۆا