قازاقستاننىڭ قۇس شارۋاشىلىعى قۇس تۇماۋىنان قورعالماعان
بۇل تۋرالى بۇگىن قازاقستان قۇس وسىرۋشىلەرى وداعىنىڭ جىل سايىنعى ەسەپتى كەزدەسۋىندە وداق پرەزيدەنتى رۋسلان ءشارىپوۆ ءمالىم ەتتى، دەپ حابارلايدى قازاقپارات.
«بىزگە ۆەتەريناريا ماسەلەسى بويىنشا ءبىرقاتار پروبلەمانى شەشۋ قاجەت. سوڭعى ۋاقىتتا قۇس تۇماۋى تارالۋىمەن قاتىستى ماسەلەنىڭ وتكىر تۇرعاندىعى ەشكىمگە دە قۇپيا ەمەس. ەۋروپانىڭ ءبىرقاتار ەلىندە قۇس تۇماۋىنىڭ تارالۋى ورىن الدى. ماسەلەن، پولشادا 8 دەرەگى تىركەلگەن. رەسەيدىڭ روستوۆ وبلىسىنىڭ جانە كراسنودار ولكەسىنىڭ ءبىرقاتار اۋماعىندا، سونىمەن قاتار وزگە دە ايماقتارىندا جۇقتىرۋ وشاقتارى تىركەلگەن بولاتىن. بۇعان دەيىن استراحان وبلىسى مەن قالماق رەسپۋبليكاسىندا شەكتەۋ ەنگىزىلگەن ەدى. وسىعان وراي مەملەكەت ەسەبىنەن قۇستاردى تولىقتاي ۆاكتسيناتسيالاۋ جۇرگىزۋدى ۇسىنامىز. بۇل «ۆەتەريناريا تۋرالى» زاڭدا كوزدەلگەن»، - دەدى ءشارىپوۆ.
ونىڭ ايتۋىنشا، بۇگىنگى تاڭدا ەلىمىزدىڭ قۇس شارۋاشىلىقتارى ۆاكتسينامەن قامتاماسىز ەتىلمەگەن. ءتىپتى وندىرىستىك جاعدايدا جۇمىس ىستەيتىن ءىرى شارۋاشىلىقتاردىڭ وزىندە تەگىن دياگنوستيكالىق تەكسەرۋ جۇرگىزىلمەيدى.
«ال ۆەتەريناريا كوميتەتىنىڭ اۋىل شارۋاشىلىعى كووپەراتيۆتەرىندەگى ۆەتەريناريا ماسەلەلەرىن قالاي شەشەتىندىگى ءالى كۇنگە دەيىن ايقىن ەمەس. ءبىز سوڭعى ەكى ايدا اۋىل شارۋاشىلىعى مينيسترلىگىنە ەپيزوتياعا قارسى ءىس-شارالار جوسپارىنا قۇس تۇماۋىنا قارسى ۆاكتسيناتسيانى قوسۋ جانە بارلىق اۋرۋ تۇرلەرىنە دياگنوستيكا جۇرگىزۋگە قاتىستى 10 نان استام حات جولدادىق. الايدا، ءالى كۇنگە جاۋاپ كەلمەدى»، - دەدى وداق پرەزيدەنتى.
اۆتور: مارلان جيەمباي