رەسەيدىڭ وليمپيادا چەمپيونى قازاق بالۋاندارىن جاتتىقتىرماق
10:49, 16 - ناۋرىز 2017
استانا. قازاقپارات - ەركىن كۇرەستەن 2004-جىلعى وليمپيادا ويىندارىنىڭ چەمپيونى حادجيمۋرات گاتسالوۆ جانە داعىستاندىق مامان مايربەك يۋسۋپوۆ قازاقستان قۇراماسىنىڭ كەڭەسشىسى بولىپ تاعايىندالدى، دەپ حابارلايدى قازاقپارات ءتىلشىسى.
قازاقستان كۇرەس فەدەراتسياسى تاراتقان مالىمەتكە سۇيەنسەك، ەركىن كۇرەستەن قازاقستان قۇراماسىن بۇعان دەيىن تاعى ءبىر رەسەيلىك مامان سەرگەي بەلوگلازوۆ جاتتىقتىرعان.
ول دايىنداعان قازاقستاندىق بالۋاندار ريو وليمپياداسىندا مەدال الا الماعان. وسىدان كەيىن بەلوگلازوۆ وتستاۆكاعا كەتتى.
ال ەندى كەلگەن مامان ەركىن كۇرەستەن الەمنىڭ بەس دۇركىن چەمپيونى، ءۇش دۇركىن ەۋروپا چەمپيونى، 2004-جىلى افينادا وتكەن وليمپيادا ويىندارىنىڭ چەمپيونى.
ەستەرىڭىزگە سالا كەتەيىك، قازاقستان بالۋاندارى 10-14 مامىردا دەليدە (ءۇندىستان) وتەتىن ازيا چەمپيوناتىنا قاتىسادى.
اۆتور: كۇنسۇلتان وتارباي