ديماش قاتىسىپ جاتقان جوبا وتاندىق تەلەارنادا كورسەتىلەتىن بولدى

استانا. قازاقپارات - قازاقستاندىق ءانشى ديماش قۇدايبەرگەنوۆ قاتىسىپ جاتقان قىتايداعى «I am a Singer»  ءان بايقاۋى وتاندىق تەلەارنادان تاراتىلادى.

بۇل تۋرالى «حابار» اگەنتتىگى باسقارما ءتوراعاسىنىڭ ورىنباسارى رينات كەرتايەۆ ءوزىنىڭ فەيسبۋكتەگى پاراقشاسىندا حابارلادى.

«قازاق ەلى دارىندارىن قولدايدى! «حابار» اگەنتتىگى ديماش ۇلىن قولدايدى! ەشتەن كەش جاقسى دەيدى اتام قازاق. قىتاي تاراپىمەن ۇزاققا سوزىلعان قيىن دا كۇردەلى كەلىسسوزدەر ارتتا قالدى. اللا قالاسا جاڭا كوكتەمگى ماۋسىمنان باستاپ «حابار» ارناسى ق ح ر- دا ءوتىپ جاتقان «I am a Singer» جوباسىنداعى ديماش قۇدايبەرگەن قاتىسقان بارلىق شىعارىلىمداردى وتاندىق كورەرمەن نازارىنا ۇسىناتىن بولادى. قۋان قازاق، قۋان كورەرمەن! العا، ديماش!!» دەپ جازدى رينات دۋمان ۇلى.

ەسكە سالا كەتەيىك، «I am a Singer» جوباسى حۋنان تەلەارناسىنان كورسەتىلەتىن رەاليتي- شوۋ فورماتىنداعى مۋزىكالىق بايقاۋ. مۇندا بايقاۋ باسىنان باستاپ 7 ۇمىتكەر قاتىسادى جانە كورەرمەندەر داۋىسىنان كەيىن ءار اپتا سايىن ءبىر ۇمىتكەر شىعىپ قالادى. كەلەسى اپتادا كونكۋرس تاعى ءبىر جاڭا قاتىسۋشىمەن تولىعىپ وتىرادى.

جوبا ءوز باستاۋىن 2013 -جىلدان العان. شارتقا سايكەس ءار جوباعا ءبىر شەتەلدىك ءانشى قاتىسۋى ءتيىس. بيىل سول مىندەتتى قازاقستاندىق ديماش اتقارىپ جاتىر. تيىسىنشە ول قۇر قاتىسىپ قانا قويماي، كۇللى الەم جۇرتشىلىعىن ءدۇر سىلكىندىردى دەسە دە بولادى. قازىر ديماش 9 كەزەڭنەن سوڭ، جالپى ەسەپتە كوش باستاپ تۇر.

بۇعان دەيىن ديماشتىڭ 10-كەزەڭدە قانداي ءان ورىندايتىنىن جاريالاعان بولاتىنبىز. الداعى سەنبىدە Singer- ءدىڭ 9-كەزەڭى ەفيردەن كورسەتىلەدى. وندا ديماش الەمگە ايگىلى كانادالىق ءانشى سەلين ديوننىڭ « All by myself» ءانىن ورىندايدى. ەستە بولسا، بۇل كەزەڭدە ديماشتىڭ ەكىنشى ورىن العانىن حابارلاعان ەدىك.