قىتايدا تۋريستەرگە ارنالعان الەمدەگى ەڭ ۇلكەن راديوتەلەسكوپ اشىلدى - فوتو

استانا. قازاقپارات - الەمدەگى ەڭ ۇلكەن FAST Five hundred meter Aperture Spherical Telescope  تەلەسكوبىنا ەندى تۋريستەر دە تەگىن كىرە الادى.

بۇل تۋرالى «سينحۋا» اقپارات اگەنتتىگى حابارلادى.

FAST وتكەن جىلدىڭ قىركۇيەك ايىندا اسپاناستى ەلىنىڭ وڭتۇستىك-باتىسىنداعى گۋيجوۋ پروۆينتسياسىندا اشىلعان بولاتىن.

تەلەسكوپتىڭ قالىپتى جۇمىس ىستەۋى ءۇشىن راديۋسى بەس شاقىرىم بولاتىن جەردە «تىنىشتىق الاڭى» بەلگىلەنگەن. ياعني، موبيلدى قۇرىلعىلاردىڭ بارلىق تۇرلەرى بۇل جەردە قولدانىلمايدى. سوندىقتان تۋريستەر كىرەر الدىندا ۇيالى تەلەفوندارىن، فوتواپپاراتتارىن جانە وزگە دە ەلەكتروندى قۇرىلعىلارىن تاپسىرۋى ءتيىس.

كۇن سايىن تەلەسكوپ ايماعىنا ەكى مىڭ ادام كەلە الادى.

ايتا كەتەيىك، الەمدەگى ەڭ ۇلكەن راديوتەلەسكوپتىڭ قۇرىلىسىن باستاۋ تۋرالى يدەيا 1994-جىلى كوتەرىلگەن. ونىڭ جالپى اۋدانى شامامەن 30 فۋتبول الاڭىنداي بولادى. جوبانىڭ قۇنى 1,2 ميلليارد يۋاندى (180 ميلليون دوللار) قۇرايدى.