قازاقستاندا مۇشەقاپتار مەن ايەلدەرگە ارنالعان توسەمەلەر سىندى جارناماعا تىيىم سالۋ ۇسىنىلدى
ق ر اقپارات جانە كوممۋنيكاتسيالار ءمينيسترى داۋرەن ابايەۆقا مينيسترلىك بلوگى ارقىلى جۇگىنگەن قازاقستاندىق اينۇر سولتانقۇل مۇنداي جارنامالار وتباسىمەن بىرگە وتىرىپ تەلەديدار كورگەن كەزدە ادامدى ۇيالتاتىندىعىن باسا اتاپ وتكەن. «وتباسى مۇشەلەرىن نەمەسە قوناقتاردى ىڭعايسىز جاعدايعا قالدىراتىن ايەلدەرگە ارنالعان توسەمەلەر، مۇشەقاپتار سىندى جارنامالاردى الىپ تاستاۋ مۇمكىن بە؟»، - دەپ جازدى ول.
وسى ورايدا، ق ر اقپارات جانە كوممۋنيكاتسيالار مينيسترلىگى «جارناما تۋرالى» زاڭعا سۇيەنە وتىرىپ، ونىڭ شەكتەۋ قويىلاتىن تۇرلەرىن اتاپ وتكەن. اتاپ ايتقاندا، ەتيل سپيرتىن جانە الكوگول ءونىمىن، انا ءسۇتىن الماستىرۋشىلاردى، سايكەستىكتى راستاۋدان وتپەگەن، سايكەستىگى مىندەتتى تۇردە راستالۋعا جاتاتىن تاۋارلاردى (جۇمىستاردى، كورسەتىلەتىن قىزمەتتەردى)، تەمەكى جانە تەمەكى بۇيىمدارىن، الكوگول ونىمىنە، تەمەكى جانە تەمەكى بۇيىمدارىنا سۇرانىس پەن قىزىعۋشىلىقتى ىنتالاندىرۋعا باعىتتالعان ءارتۇرلى ءىس-شارالار، سونىڭ ىشىندە ۇتىستار، لوتەرەيالار ويناتۋ نىسانىندا، قارجىلىق (ينۆەستيتسيالىق) پيراميدانىڭ قىزمەتىن جارنامالاۋعا تىيىم سالىنادى.
الكوگول ءونىمىن، تەمەكى جانە تەمەكى بۇيىمىن تىكەلەي نەمەسە جاناما ۇسىناتىن، الكوگول ءونىمىنىڭ، تەمەكى جانە تەمەكى بۇيىمىنىڭ اتاۋى رەتىندە بەلگىلى بولعان تاۋار بەلگىسىنىڭ ەلەمەنتتەرىن نەمەسە اتاۋىن پايدالانا وتىرىپ، تاۋارلاردى (جۇمىستاردى، كورسەتىلەتىن قىزمەتتەردى) جارنامالاۋعا تىيىم بار.
«بۇعان قوسا، مەديتسينالىق قىزمەتتەردى، پروفيلاكتيكانىڭ، دياگنوستيكانىڭ، ەمدەۋدىڭ جانە مەديتسينالىق وڭالتۋدىڭ ادىستەرى مەن قۇرالدارىن، دارىلىك زاتتاردى، مەديتسينالىق تەحنيكا مەن مەديتسينالىق ماقساتتاعى بۇيىمداردى، تاعامعا بيولوگيالىق بەلسەندى قوسپالاردى جارنامالاۋدىڭ ەرەكشەلىكتەرى قازاقستان رەسپۋبليكاسىنىڭ دەنساۋلىق ساقتاۋ سالاسىنداعى زاڭناماسىمەن رەتتەلەدى. جوعارىدا ايتىلعانداردىڭ نەگىزىندە ايەلدەردىڭ گيگيەنالىق زاتتارى مەن كونتراتسەپتسيا زاتتارىن بۇقارالىق اقپارات قۇرالدارىندا جارنامالاۋ قازاقستان رەسپۋبليكاسىنىڭ «جارناما تۋرالى» زاڭىمەن شەكتەۋ قويىلماعان. وسىعان وراي ءسىز اتاپ وتكەن جارنامالاردى تەلەارنالاردا تاراتۋعا شەكتەۋ قويۋ شارالارىن قابىلداۋ مۇمكىن ەمەس»، - دەلىنگەن جاۋاپتا.
اۆتور: مارلان جيەمباي