قازاقستاندا تىگىلگەن جەيدەلەر ەكسپورتقا شىعا باستادى
"Dalatex" ءبرەندى كەڭ ۇلگىدە، قىناما بەلدى جانە جارتىلاي ۇزىندىقتاعى ۇلگىمەن ءارتۇرلى ماتالاردان ەرلەر جەيدەلەرىن ۇسىنادى، دەپ حابارلادى قازاقپارات ح ا ا ءتىلشىسى «دامۋ» قورىنا سىلتەمە جاساپ. فابريكانىڭ نەگىزىن قالاۋشى دىلمۇحامەد ابيزوۆ بيزنەستەگى جولىن 20 جىل بۇرىن باستاعان. ول كاسىبىن دامىتۋ ماقساتىندا «بيزنەستىڭ جول كارتاسى - 2020» باعدارلاماسى اياسىندا 14 پايىزبەن 30 ميلليون تەڭگە نەسيە العان، ونىڭ 10 پايىزدىق ۇستەمەسىن مەملەكەت قايتارىمسىز نەگىزدە سۋبسيديالاۋدا. دىلمۇحامەدتىڭ سوزىنشە، ءوز بيزنەسىن ءارتاراپتاندىرۋ ءۇشىن جانە ساۋدادان وندىرىسكە ءوتۋ قادامىن جاساۋعا كوپ ويلانىپ بارعان. ەڭ باستىسى، ناقتى قادام جاساۋ ارقىلى ول ءوزىنىڭ اينالاسى مەن مەملەكەتتىڭ ۇلكەن كومەگىن سەزىنە الدى.
«مەن ءوز ارمانىمدى جۇزەگە اسىرا العانىما قۋانىشتىمىن. كۇندەلىكتى 200 دەن استام جەيدەلەر تىگۋدەمىز. ال شەبەرلەرىمىز كويلەكتىڭ ءار ءتۇرىن ۇسىنا وتىرىپ، تالعامى جوعارى تۇتىنۋشىلاردىڭ تاپسىرىسىن ورىنداۋدا. ءبىزدىڭ ءونىمدى جەرگىلىكتى حالىق قانا ەمەس، وزگە ءوڭىر تۇرعىندارى دا ۇناتىپ، ساتىپ الۋدا. بۇل - ەڭبەگىمىزدىڭ جەمىسى»، - دەيدى دىلمۇحامەد ابيزوۆ.
اۆتور: ەلۋباي اۋەزوۆ