قازاق قىزى انگليادا تەرى ءوندىرىسىنىڭ جۇمىسىن دوڭگەلەتىپ وتىر - فوتو، كەسكىن
بۇل تۋرالى The Astana Times حابارلايدى.
ول اۋدارماشى بولىپ جۇمىس ىستەگەننەن كەيىن وزىنە جاڭا حوببي تاۋىپ، اينالىسا باستايدى. اعىلشىن مەن يتاليان ءتىلىن جاقسى مەڭگەرگەن ايمان ۇلى بريتانيادا 10 جىلدان بەرى تۇرىپ كەلە جاتىر.
ساندىك قولدانبالى ونەرمەن التى جىلدان بەرى اينالىساتىن ول، تەك تەرىمەن عانا ەمەس، مەتال، اعاش، جىبەك، كۇمىستى دە ءوز ىسىنە ءجيى پايدالانادى.
«مەن تەرىمەن جۇمىس ىستەگەن كەزدە ەسكى ادىستەردى كوپ قولدانامىن ءاربىر ونىمدە كوشپەلى مادەنيەتتى ەسكە تۇسىرەتىن، ساق پەن سارمات داۋىرىنەن حابار بەرەتىن تاڭبالار بار»، - دەيدى ول.
ول ءوز بيزنەسىندەگى بارلىق فۋنكتسيانى ءوزى اتقارىپ وتىر. كاسىپكەر دە، تىگىنشى دە، مەنەدجەر دە جالعىز ءوزى.
«مەن قازاقستاننانمىن. بۇل ۇلتتىق قانمەن بەرىلەتىن ونەر. مەن قازاقستاندى ناسيحاتتاپ جاتىرمىن دەمەيمىن. ەلگە مەنىڭ قولداۋىم كەرەك دەپ تە ويلامايمىن. مەملەكەت الەمدىك دەڭگەيگە ءوزىن ءوزى تانىتا الادى. «Kazakhsha» ستۋدياسى مەنىڭ قايدان ەكەنىمدى، تەگىمنىڭ كىم ەكەنىن بىلدىرەدى»، - دەيدى ساعاتوۆا.
ستۋديادا ول سومكە، ءاميان، بەلدىك سەكىلدى ونىمدەردى دايىندايدى. ونىڭ سوزىنشە، ءوزى جاساپ شىققان ءاربىر زاتتى ەرەكشە جاقسى كورەدى.
«ماعان قازاقشا دۇنيەلەر كوپ ۇنايدى. ولار مەن ءۇشىن جانىمنان جاقىن نارسەلەر، ءبىراق مەن ولاردى كليەنت تالابى مەن ءتۇرلى تالعامعا بايلانىستى ءارتۇرلى پايدالانامىن. ورتالىق ازيا ەلدەرى ەۆروپا ءۇشىن ءالى اشىلماعان عالام سياقتى. كوپ ادام قازاقستاندى بىلمەگەنىمەن، قازاقشا دۇنيەلەرگە ەرەكشە قىزىعا قارايدى. كوپتەگەن اعىلشىن قىزدارى قازاقشا بەزەندىرىلگەن بىلەزىكتەردى جاقسى كورەدى»، - دەيدى ايمان.
ول ءوز ونىمدەرى ءوز سايتى ارقىلى جارنامالاپ ساتادى.
ايماننىڭ ونىمدەرىن ونلاين-نارىقتا ەرەكشە تانىمال Etsy ەلەكتروندى كوممەرتسيا ورتالىعىنان تابۋعا بولادى.