مينيسترلىك ترانزيتتىك تاسىمالدان تۇسەتىن تابىس كوزدەرىن جاريالادى
بۇگىن استانادا وتكەن باسپا ءسوز ءماسليحاتىندا ق ر ينۆەستيتسيالار جانە دامۋ مينيسترلىگىنىڭ ترانزيتتىك جانە كولىكتىك لوگيستيكانى دامىتۋ دەپارتامەنتى ديرەكتورىنىڭ ورىنباسارى سەرىك باشيموۆ اتالعان كورسەتكىشكە جەتۋ جولدارى جايىندا ايتىپ بەردى، دەپ حابارلايدى قازاقپارات ءتىلشىسى.
«قىتاي - ەۋروپا - قىتاي باعىتىنداعى تەمىرجول قاتىناسى ارقىلى كونتەينەرلىك تاسىمالدان شامامەن 1,5 ميلليارد دوللار تۇسەدى دەگەن بولجام بار. قىتاي - يران - يراك تەمىرجولىنان 400 ميلليون، سونداي- اق قىتاي - كاۆكاز - ىستانبۇل باعىتىنداعى كونتەينەرلىك تاسىمالدان 400 ميلليون دوللار ءتۇسۋى ءتيىس»، - دەيدى باشيموۆ.
ونىڭ ايتۋىنشا، بۇگىندە قازاقستاننىڭ اۋە كەڭىستىگى ارقىلى جولاۋشىلاردىڭ ترانزيتتىك تاسىمالى دا ءبىراز پايدا اكەلىپ وتىر. سوڭعى بەس جىلدا اتالعان كورسەتكىش ءتورت ەسەگە ءوستى. 2012 -جىلى قازاقستان تەرريتورياسى ارقىلى ۇشىپ وتەتىن جولاۋشىلاردىڭ سانى 120000 ادام بولسا، 2016 -جىلدا ولاردىڭ سانى 478000 ادامعا ارتتى. اعىمداعى جىلدىڭ سوڭىندا جولاۋشىلاردىڭ ترانزيتتىك تاسىمالى 600000 ادامعا جەتەدى دەگەن بولجام بار.
وتكەن جىلى وسى تاسىمالدان تۇسكەن تابىستىڭ كولەمى 267 ميلليارد تەڭگەنى قۇراعان. «بۇدان بولەك، اقىلى جولداردى ەنگىزۋدىڭ ارقاسىندا قازاقستان ارقىلى وتەتىن جۇكتەردەن دە تابىس تۇسەدى. ونىڭ جالپى كولەمى 18 ميلليون دوللارعا دەيىن جەتۋى ءتيىس»، - دەپ اتاپ كورسەتتى باشيموۆ.
بريفينگ كەزىندە ول «استانا - تەمىرتاۋ»، «الماتى - قورعاس» پەن «الماتى - قاپشاعاي» تاس جولدارىندا اقىلى جۇيەنى ەنگىزۋ مەرزىمىن دە جاريالادى.
ايتا كەتەيىك، بۇگىندە ۇكىمەتكە قازاقستاننىڭ ترانزيتتىك الەۋەتىن كوتەرۋ بويىنشا ۇلكەن مىندەتتەر جۇكتەلىپ وتىر. اتاپ ايتقاندا، 2020 -جىلعا دەيىن رەسپۋبليكا ارقىلى تاسىمالداناتىن جۇك كونتەينەرلەرىنىڭ سانى 2 ميلليون داناعا، ال اۋە كەڭىستىگى ارقىلى ۇشىپ وتەتىن ترانزيتتىك جولاۋشىلاردىڭ سانى 1,6 ميلليون ادامعا جەتۋى ءتيىس.
اۆتور: ارمان اسقاروۆ