رەسپۋبليكالىق ءۇش جولدا اقىلى جۇيە ەنگىزىلەتىن ۋاقىت اتالدى

استانا. قازاقپارات - اعىمداعى جىلى رەسپۋبليكا بويىنشا ءۇش باعىتتاعى تاسجولدا اقىلى جۇيەنى ورناتۋ جۇمىستارى اتقارىلادى، دەپ حابارلايدى قازاقپارات ءتىلشىسى.

 «بيىل تەك تەحنيكالىق جۇمىستار عانا جۇرگىزىلەدى. بۇل دەگەنىمىز، «استانا - تەمىرتاۋ»، «الماتى - قورعاس» پەن «الماتى - قاپشاعاي» تاس جولدارىندا اقىلى جۇيەنى ورناتۋ شارالارى اتقارىلادى. اعىمداعى جىلدا ەشقانداي اقى الىنبايدى. ال كەلەسى جىلى، ياعني 2018 -جىلدىڭ 1 - قاڭتارىنان باستاپ اتالعان ءۇش باعىت اقىلى بولادى»، - دەدى ق ر ينۆەستيتسيالار جانە دامۋ مينيسترلىگى ترانزيتتىك جانە كولىكتىك لوگيستيكانى دامىتۋ دەپارتامەنتىنىڭ ديرەكتور ورىنباسارى سەرىك باشيموۆ بۇگىن استانادا وتكەن باسپا ءسوز ءماسليحاتىندا.

 ونىڭ ايتۋىنشا، جاڭا جولدارداعى اقىنىڭ مولشەرى «استانا - بۋراباي» تاسجولىمەن بىردەي بولادى. اتاپ ايتقاندا، جەڭىل كولىكتەر ءار شاقىرىم ءۇشىن 1 تەڭگە تولەسە، جۇك كولىكتەرى ءۇشىن 25 تەڭگە بولادى. «قازىرگى كەزدە «استانا - بۋراباي» تاس جولىنان جىل سايىن 1,5 ميلليارد تەڭگە ءتۇسىپ وتىرادى. ول اقشاعا جولدى كۇتىپ ۇستاۋ، سان الۋان جوندەۋ شارالارى اتقارىلادى. جاڭا اقىلى ءۇش جولدىڭ اقشاسى دا سوعان جۇمسالادى»، - دەپ اتاپ كورسەتتى باشيموۆ.

 اۆتور: ارمان اسقاروۆ