قىتايلىق جانكۇيەرلەردىڭ سىيى ديماشتى ەرەكشە تولقىتتى - فوتو
بۇل تۋرالى ءانشىنىڭ دوسى ءارى رەسمي وكىلى الپامىس شاريموۆ ءوزىنىڭ ينستاگرامداعى پاراقشاسىندا جازدى.
«ديماشتىڭ @kudaibergenov.dimash جانكۇيەرلەرى كۇننەن- كۇنگە تاڭقالدىرۋلارىن قويمايدى. راسىمەن، ماقتانعا سالىنبايىقشى دەپ، كوپ توسىن سىيلاردى جاريالاي بەرمەيمىز. ءبىراق، بۇگىنگىسى ەرەكشە! قىتاي فاناتتارى ارنايى قازاقستاندى زەرتتەپ، ۆيزا اشىپ، ەلىمىزگە بارىپتى. ديماشتىڭ قارنى اشىپ قالماسىن دەپ، قازاق ۇلتتىق تاعامدارىن دايىنداپ بۇگىنگى تۇسكى استا ءبىزدى تاڭقالدىردى. قازى- قارتا، تارى- تالقان، قۇرت- ماي، جەمىس- جيدەك ءبارى بار! جىراقتا جۇرگەن جان ءۇشىن بۇل تاعامداردىڭ ورنى ەرەكشە ەكەنى ءسوزسىز! قوراپ- قوراپ سىيلىق. ءالى اشىپ تا ۇلگەرمەي جاتىرمىز! بارلىعى انشىسىنە دەگەن نيەتى عوي جانكۇيەرلەردىڭ...»، - دەيدى ول.
«جالپى، ديماشقا ارنالعان فان- توپتار كوپ. بۇل #DimashSisters ياعني «ديماشتىڭ قارىنداستارى» اتتى فان توپتىڭ سىيلىعى. قيالدارىندا شەك جوق قوي شىركىن!؟ قانداي كەرەمەت!.. ديماشتىڭ اتىنان بارشا #DimashSister فان توبىنىڭ قىزدارىنا العىس بىلدىرەمىن! بۇگىن ءبىز راسىمەن دە اۋىلعا بارىپ قايتقانداي بولدىق!!! راحمەت، Dears!» ، - دەدى الپامىس شاريموۆ ءوزىنىڭ ينستاگرامداعى پاراقشاسىندا. قۋانتارلىق جاعداي، ديماشتىڭ 9 - قاڭتاردا اشقان Sina Weibo (تۋيتتەردىڭ بالاماسى) الەۋمەتتىك جەكە پاراقشاسىنا جازىلعان جانكۇيەرلەر سانى 2 ميلليون 800 مىڭعا جەتتى.
ەسكە سالا كەتسەك، ديماش «Singer-2017» ءان بايقاۋىنىڭ سەگىز كەزەڭىندە ونەر كورسەتتى. بۇل كەزەڭ 11 - ناۋرىزدا ەفيردەن كورسەتىلەتىن بولادى.
اۆتور: مۇحتار قاليموللا ۇلى