بۇل تۋرالى CNN ارناسى حابارلادى.
«ءبىز القاپقا مەتالل ىزدەۋشىمەن شىقتىق. بىرنەشە ەسكى تاقتايشالار تاپساق ەكەن دەگەن ۇمىتتە بولاتىنبىز»، - دەدى دانيەلدىڭ اكەسى كلاۋس.
Messerschmitt فيرماسى قۇراستىرعان ۇشاقتىڭ بىرنەشە جارىقشاقتارىن العاننان سوڭ، ونىڭ قالعان بولىگىن ىزدەۋ ءۇشىن ەكسكاۆاتور جالداعان كريستيانسەندەر ۇشقىشتىڭ سۇيەگىن تاپتى. «العاشىندا باتپاق اراسىنان مەتالل سىنىقتارىن، سودان كەيىن ويلاماعان جەردەن ادام سۇيەگى مەن كيىم قالدىقتارىن كەزدەستىردىك»، - دەدى كلاۋس كريستيانسەن.
ول ۇشاقتىڭ شامامەن 1944-جىلى قۇلاۋى مۇمكىن ەكەنىن اتاپ ءوتتى. سولتۇستىك يۋتلانديانىڭ تاريحي مۋزەيى ۇشاق قالدىقتارىن زەرتتەۋمەن اينالىسىپ جاتىر، ولار جاقىن ارادا ۇشقىشتىڭ اتى- ءجونىن انىقتاۋى مۇمكىن.
جەرگىلىكتى پوليتسيا تابىلعان ولجا تۋرالى گ ف ر ەلشىلىگىنە حابار بەردى.