جەڭىپ العان جۇلدەلەرىنە جەتىم بالالارعا سىي جاسادى - فوتو، ۆيدەو

استانا. قازاقپارات - كەشە استانا قالاسىنداعى «سارىارقا» ساۋدا ورتالىعىنداعى كينوتەاتر ءىشى كۇلىمدەگەن بۇلدىرشىندەر مەن ولاردىڭ شات كۇلكىسىنە تولدى.

«ازىرەت سۇلتان» مەشىتىنىڭ شاكىرتتەرى ۇيىمداستىرۋىمەن «SOS بالالار اۋىلىنداعى» 100 تاربيەلەنۋشى تەگىن كينو تاماشالاپ، كوڭىل كوتەرىپ قايتتى.

 ايتا كەتەيىك، وسىدان ءبىر اپتا بۇرىن «ازىرەت سۇلتان» مەشىتىنىڭ 5  جىلدىعىنا وراي شاكىرتتەر اراسىندا سپورتتىق سايىس ۇيىمداستىرىلعان بولاتىن. اتالمىش سايىسقا 12 ۇستازدىڭ شاكىرتتەرى اراسىنان 24 كوماندا جاساقتالىپ، فۋتبول جانە ۆولەيبول ويىندارى بويىنشا باق تالاستىرعان بولاتىن. سايىس قورىتىندى بويىنشا «ازىرەت سۇلتان» مەشىتىنىڭ ءبىرىنشى نايب يمامى قۋات ەرعالي ۇلىنىڭ شاكىرتتەرىنەن قۇرالعان «سۇلتان» كومانداسى ۆولەيبول سايىسىنان -  I ورىن (جۇلدە قورى  50000) ، ال فۋتبول جارىسىنان  Ⅲورىن (20000) يەلەنگەن بولاتىن.

جەڭىمپاز شاكىرتتەر وزدەرىنىڭ بۇل جۇلدەلەرىن قايىرىمدىلىق شاراسىنا جۇمساپ، جەتىم بالالارعا سىيلىق جاساۋدى ءجون ساناپتى. ۇستازدارىمەن اقىلداسا كەلە بۇلدىرشىندەردى كينوعا اپارىپ، ءتاتتى تاعامدارمەن سىيلاۋعا توقتالعان. الدىن الا بۇلدىرشىندەر تاڭداۋىنا ەرىك بەرىلىپ، سۇراۋ بويىنشا «ۆ پويسكاح مامى» فيلمى كورسەتىلدى. مەشىت شاكىرتتەرى بۇلدىرشىندەردىڭ بارلىعىنا ءتاتتى سۋسىندار مەن تاعامدار تاراتىپ، «كىشكەنتاي قوناقتارعا» ەرەكشە قۇرمەتپەن قارسى الدى.

فيلم باستالماستان بۇرىن «ازىرەت سۇلتان» مەشىتىنىڭ ءبىرىنشى نايب يمامى قۋات ەرعالي ۇلى بالالارعا ىزگى تىلەگىن ءبىلدىرىپ، قايىرىمدىلىق شاراسىنىڭ مەشىت شاكىرتتەرى اتىنان جاسالىپ وتىرعانىن جەتكىزدى. ءوز كەزەگىندە جەڭىمپاز شاكىرتتەر «بالالار اۋىلىنىڭ» كىشكەنتاي سپورتشىلارىنا جەڭىپ العان كۋبوكتارىن تارتۋ ەتىپ، ەستەلىك سۋرەتكە ءتۇستى. ۇنەمى قۇلشىلىق وردالارىنىڭ قامقورلىعىنا كۋا بولىپ كەلە جاتقان «SOS استانا بالالار اۋىلىنىڭ» باسشىلىعى دا ءوز ريزاشىلىقتارىن ءبىلدىرىپ، «ازىرەت سۇلتان» مەشىتىنە ارنايى «العىس حات» تابىستادى.

Muslim.kz