ەكونوميكالىق تەرگەۋ قىزمەتىنىڭ قىزمەتكەرى ار مەن ادالدىقتىڭ سيمۆولى - فوتو
وسى ءبىر ەرەكشە كۇندە قىز- كەلىنشەكتەرگە ارنالىپ ولاردىڭ جۇرەكتەرىنىڭ جىلىلىعى مەن جاندارىنىڭ جومارتتىعى، مەيىرىمدىلىگى ءۇشىن، اينالانى كورىكتى ەتە تۇسۋگە دەگەن قۇشتارلىعى ءۇشىن ايتىلاتىن العىسقا تولى اسەرلى سوزدەر ەرەكشە مانگە يە بولماق.
وسى ايتۋلى مەرەكەدە قۇقىق قورعاۋ ورگاندارىندا قىزمەت ەتەتىن نازىك جاندى، قايسار رۋحتى ارۋلار ءۇشىن كەز كەلگەن ازاماتتىڭ كەۋدەسىن قۋانىش كەرنەيدى. كەشەگى ءاليا مەن مانشۇكتىڭ سىڭىلىلەرى وجەت قىزدارىمىز وتباسىنىڭ ۇيىتقىسى بولا وتىرىپ، ەرلەرمەن قاتار ەگەمەندى ەلىمىزدى گۇلدەندىرۋ باعىتىندا ايانباي ەڭبەك ەتۋدە.
سولاردىڭ قاتارىندا قر قارجى مينيسترلىگىنىڭ مەملەكەتتىك كىرىستەر كوميتەتى ەكونوميكالىق تەرگەۋ قىزمەتىنىڭ ساراپشى- وفيتسەرى جانار شاياحمەتوۆا دا بار. جانار مىرزاعالي قىزى شىعىس قازاقستان وبلىسىندا، كيەلى دە ءارى قاسيەتتى اباي ەلىندە دۇنيەگە كەلگەن. ەلىمىزدىڭ ەكونوميكالىق قاۋىپسىزدىگىن قورعاۋ باعىتىندا 18 جىلدان استام قىزمەت ەتىپ كەلە جاتقان جانار تەك بىلىكتى مامان عانا ەمەس، كوپ بالالى انا دا.
ەڭبەك جولىن قازاقستان رەسپۋبليكاسى ىشكى ىستەر مينيسترلىگىنە قاراستى زاڭ ينستيتۋتىنان باستاپ، ۇزاق جىلدار رەسپۋبليكانىڭ كەدەندىك باقىلاۋ كوميتەتىنىڭ ورتالىق اپپاراتىندا قىزمەت ەتىپ كەلەدى. تىڭنان جول تابا بىلەتىن بىلىكتىلىگىنىڭ ارقاسىندا پودپولكوۆنيك شەنىنە دەيىن ءوسىپ، ەسەلى ەڭبەك ەتۋدە.
بۇگىنگى كۇندە وتباسىلى، جۇبايى قايرات ەكەۋى قىزى نازيرا مەن ءۇش ۇلدى تاربيەلەپ ءوسىرىپ وتىر. ول بارلىق سانالى ءومىر جولىن وتان مەن حالىق مۇددەسىنە ارناپ، وزىنە جۇكتەلگەن مىندەتتەردى ادال اتقارعاندىعىنىڭ، بىلىمدىلىگى مەن بىلىكتىلىگىنىڭ، تەرەڭ رۋحاني بايلىعى مەن پاراساتتىلىعىنىڭ ارقاسىندا جۇمىسىندا ايتۋلى كورسەتكىشتەرگە قول جەتكىزىپ، ابىروي مەن بەدەلگە يە بولدى.
2014 -جىلدان باستاپ قۇقىق قورعاۋ ورگاندارىن جاڭعىرتۋدىڭ كەزەكتى ساتىسىندا جاڭادان قۇرىلعان ەكونوميكالىق تەرگەۋ قىزمەتىنە اۋىسىپ، وسى قىزمەتتىڭ قالىپتاسۋىنا ۇلكەن ۇلەسىن قوسۋدا. جىلدار بويعى ەڭبەكتىڭ ارقاسىندا جۇمىسىنا ىسىلىپ العان جانار مىرزاعالي قىزى ءوز قىزمەتىن ادال دا ءمىنسىز اتقارادى دەسەك، ارتىق ايتقاندىق ەمەس. جۇمىس كۇنى شەكتەۋسىز. ۋاقىتپەن ساناسپاي، ەرتە كەلىپ، كەش كەتۋ كەرەك.
اسا جاۋاپتى دا ماڭىزدى قىزمەت. وسىنىڭ بارىنە قاراماستان جانار تاڭداعان جولىنان ەشقاشان تايىنعان ەمەس. ەكونوميكالىق تەرگەۋ قىزمەتىنىڭ حالىقتىڭ الدىندا بەدەلىن ارتتىرۋ، قىلمىستىق ىستەردى تياناقتى تەرگەۋ ءۇشىن قاجەتتى ءتۇرلى ساراپتامالاردى تاعايىنداۋدى قارجىلىق قامتاماسىز ەتۋ، ساپالى كادر ساياساتىن جۇرگىزۋ سەكىلدى تياناقتىلىق پەن اسا جاۋاپكەرشىلىكتى قاجەت ەتەتىن سالادا ءوز قىزمەتىن تابىستى اتقارۋدا.
ەڭبەگى دە ەلەنىپ، مەملەكەتتىڭ ەكونوميكاسىن ارتتىرۋعا قوسقان ۇلەسى ءۇشىن «قازاقستان رەسپۋبليكاسىنىڭ تاۋەلسىزدىگىنە 25 -جىل» مەرەكەلىك مەدالىمەن ماراپاتتالدى. جانار مىرزاعالي قىزى قىزمەتكە جاڭادان قابىلدانعان جاس قىزمەتكەرلەرگە اقىل- كەڭەسىن ايتىپ، تاجىريبەسىمەن بولىسەتىن بىلىكتى مامانداردىڭ قاتارىندا. ەكونوميكالىق تەرگەۋ قىزمەتىنىڭ الدىنا قويىلعان مىندەتتەردى شەشۋدەگى تولىمدى وي- پىكىرلەرى مەن تاپقىرلىعى، ارىپتەستەرىمەن قارىم- قاتىناستاعى قاراپايىمدىلىعى، جۇمىستاعى ءاربىر بەرىلگەن تاپسىرماعا ىجداحاتپەن زەر سالىپ، جانىن بەرىپ ەڭبەك ەتۋى سوڭىنان ەرىپ كەلە جاتقان جاس بۋىن قىزمەتكەرلەرگە ونەگە بولارلىق قاسيەت. «بەسىگىڭنەن تاربيە بولعان كەزدە، ەسىگىڭنەن ەشبىر جاۋ اتتاماعان»، - دەگەندەي ەلىنىڭ، حالقىنىڭ ەرتەڭىن ويلاعان انا رەتىندە ول ۇلدارى مەيىرحان، دارحان، باقداۋلەتتى ەگەمەندى مەملەكەتىمىزدىڭ نامىسى مەن جىگەرى كەۋدەسىن كەرنەگەن ازاماتتارى ەتىپ تاربيەلەپ، وتانسۇيگىشتىك، قايسارلىق سىندى قاسيەتتەرگە باۋليدى. بۇل سوزىمىزگە ۇلكەن ۇلى مەيىرحاننىڭ الماتى قالاسىنداعى اسكەري اكادەميانىڭ 2- كۋرسىندا وقىپ جاتقانى دالەل بولا الادى. ال قىزى ءنازيرا كورەيادا حالىقارالىق قاتىناستار سالاسىندا ءبىلىم الۋدا.
ءسوز سوڭىندا بىلىكتى قىزمەتكەر، اياۋلى انا جانار مىرزاعالي قىزى سياقتى پوگون تاققان ارۋلاردى مەرەكەلەرىمەن قۇتتىقتاپ، ەڭبەكتەرىنە تابىس، وزدەرىنە دەنساۋلىق، وتباسىلارىنا اماندىق، تاڭمەن تالاسا اتقان ءار كۇندەرى قۋانىش تىلەيمىز.
اۆتور: مارلان جيەمباي