مىلتىق ۇستاپ جۇرگەن اكىم حالىقتىڭ زارەسىن ۇشىردى
رەداكتسيامىزعا حابارلاسقان وسى اۋىلدىڭ تۇرعىنى دا جەرگىلىكتى اتقامىنەردىڭ مىلتىق ۇستاپ كەلگەنىن جەتكىزدى.
قازاقپارات ءتىلشىسى اكىمگە دە حابارلاسىپ، وقيعانىڭ ءمان-جايىن سۇراپ ءبىلدى. «باسىندا كورشىنىڭ كەلىنشەگى بىزگە كەلىپ، «ءيتىڭىز قىزىمدى قاۋىپ الدى، دەپ ايعاي-شۋ شىعاردى. بىلمەيمىن، ءيت قاۋىپ السا، مەديتسينالىق انىقتامانى كورسەتەتىن ەدى، ەمگە اقشا تالاپ ەتەتىن ەدى. ول جوق. سوسىن سول كۇنى قىزىنىڭ ءدال ءۇيىمىزدىڭ جانىنان ءوتىپ بارا جاتقانىن كوردىك. قۇپ، ول قىزدىڭ ءيتىمىزدىڭ قاپقان-قاپپاعانىن ەشكىم بىلمەيدى. ءبىراق تۋرا ءبىر ساعاتتان كەيىن ءۇيىمىزدىڭ الدىنا بەس ادام توپىرلاپ كەلدى. ىشىندە ءۇش ەر ادام بولدى. بىرەۋى شىتتاي كيىنگەن، باسىندا قاراكۇزەن بوركى بار، قولىندا مىلتىق. ءسىز ءوزى كىمسىز؟ دەپ سۇراسام، «مەن اكىممىن» دەپ جاۋاپ بەردى.
سوندا ەسىمە ءتۇستى، ءبىر رەت جازدا كورشىلەرمەن بىرگە بارىپ، جول ماسەلەسىن ايتقاندا اكىمنىڭ ءوزى ءبارىمىزدى تىڭداپ شىققان. ءبىراق ءالى كۇنگە دەيىن ناتيجە جوق. مەن ايتامىن، سىزدەردە ءيت اتۋدان باسقا جۇمىس جوق پا؟»، - دەيدى قوسشى اۋىلىنىڭ تۇرعىنى لياززات دۇيسەمبايەۆا.
قازاقپارات ءتىلشىسى استاناعا ىرگەلەس جاتقان قوسشى اۋىلدىق وكرۋگىنىڭ اكىمى دىنمۇحاممەد قاليەۆكە دە حابارلاستى. اۋىل باسشىسى ول ۇيگە بارعانىن جانە قولىندا مىلتىق ۇستاعانىن مويىنداپ وتىر. «ول جەردە كورشىسىنەن بوس جۇرگەن ءيت قىزىن قاۋىپ الدى دەگەن ارىز ءتۇستى. ءبىز ارىز بويىنشا سول جەرگە باردىق. ءيتتى اتقان جوقپىن. ونىمەن «ءتورت تۇلىك» دەگەن ۇيىم اينالىسادى.
سوسىن اتقان كۇننىڭ وزىندە كادىمگىدەي وقپەن ەمەس، ۇيىقتاتاتىن دارىمەن اتادى. سوندا ءبىز بارىپ، ءيتتىڭ يەسىنە ەسكەرتۋ جاساپ كەتكەنبىز. ءيا، ماشينادان تۇسكەندە مىلتىقتى قولىمدا ۇستادىم. «ءتورت تۇلىكتىڭ» ادامدارى مەنىڭ ماشيناممەن باردى عوي. سول كەزدە الىپ شىققانمىن. ءبىراق ءيتتى اتقان جوقپىز»، - دەپ اتاپ كورسەتتى قاليەۆ.
دەگەنمەن، «اكىم مىلتىق ۇستاپ، ءيت اتىپ ءجۇر» دەگەندى ەستىگەن سول ءۇيدىڭ كەيۋاناسى قاتتى قورقىپ قالعان. زارەسى ۇشىپ، قان قىسىمى كوتەرىلگەن. بۇگىن ونى اۋرۋحاناعا جاتقىزدى. «ال اناۋ ءبىر جۋاس ءيتىمىزدى بىرەۋ باستان ۇرىپ ءولتىرىپ كەتكەن»، - دەيدى لياززات دۇيسەمبايەۆا.
اۆتور: ارمان اسقاروۆ