ءاسانالى ءاشىموۆ وڭتۇستىك قازاقستان وبلىسىنىڭ قۇرمەتتى ازاماتى اتاندى

استانا. قازاقپارات - وڭتۇستىك قازاقستان وبلىستىق «جاستار رەسۋرستىق ورتالىعىندا» قازاقستاننىڭ حالىق ءارتىسى، مەملەكەتتىك سىيلىقتىڭ لاۋرەاتى ءاسانالى ءاشىموۆتىڭ «اڭىزعا اينالعان ءاسانالى» اتتى شىعارماشىلىق كەشى ءوتتى.  

شاراعا وبلىس اكىمى جانسەيىت تۇيمەبايەۆ ارنايى قاتىسىپ، ۇلتتىق ساحنا جانە كينوونەرىنىڭ دارابوزى، اتى اڭىزعا اينالعان ءبىرتۋار تۇلعانى 80 جىلدىق مەرەيتويىمەن ارنايى قۇتتىقتادى.

«وسىناۋ مەرەيلى كۇندە ەلىمىزگە سىڭىرگەن ادال دا ابىرويلى ەڭبەگىڭىز ءۇشىن شىنايى العىس سەزىمىمدى بىلدىرەمىن. سىزگە وڭتۇستىك قازاقستان وبلىسى تۇرعىندارىنىڭ اتىنان، ميلليونداعان جانكۇيەرلەرىڭىزدىڭ اتىنان «وڭتۇستىك قازاقستان وبلىسىنىڭ قۇرمەتتى ازاماتى» اتاعىن تابىس ەتۋگە رۇقسات ەتىڭىز. سىزگە زور دەنساۋلىق، جاڭا شىعارماشىلىق تابىستار، وتباسىڭىزعا بەرەكە، باياندى باقىت تىلەيمىن»، - دەدى جانسەيىت قانسەيىت ۇلى.

ايماق باسشىسى مەرەيتوي يەسىنىڭ يىعىنا قازاقى شاپان جاۋىپ، استىنا ات مىنگىزدى. كەش ت. جۇرگەنوۆ اتىنداعى قازاق ۇلتتىق ونەر اكادەمياسى ستۋدەنتتەرى «اڭىزعا اينالعان ءاسانالى» اتتى تەاترلاندىرىلعان مۋزىكالىق قويىلىمىمەن جالعاستى.

ايتا كەتەيىك، ءاسانالى ءاشىموۆ 1961-جىلى قازاقتىڭ مەملەكەتتىك قۇرمانعازى اتىنداعى ۇلتتىق كونسەرۆاتورياسىنىڭ تەاتر فاكۋلتەتىن اكتەر ماماندىعى بويىنشا ءبىتىرىپ، «قازاق فيلم» كينوستۋدياسىنا جۇمىسقا قابىلداندى. اكتەر ويناعان «ءان قاناتىندا»، «قىز جىبەك»، «اتاماننىڭ اقىرى»، «ترانس سىبىر جۇردەك پوەزى»، «جاۋشى»، «نان ءدامى»، «قازاقى وقيعا»، «ءسىز كىمسىز، كا مىرزا؟»، كوپ سەريالى «بۇلعارلار تۋرالى بايان» فيلمدەرى قازاق كينوسىنىڭ دامۋىنا زور ۇلەسىن قوستى.

اتاقتى اكتەر تەاتر ساحناسىندا م. اۋەزوۆتىڭ «ابايىن» كەرىم، «ەڭلىك-كەبەگىندە» كەبەك، «قارا قىپشاق قوبىلاندىسىندا» ايشۋاق، «تاڭعى جاڭعىرىعىندا» جاراسباي، ع. مۇسىرەپوۆتىڭ «قوزى كورپەش - بايان سۇلۋىندا» قودار، ق. مۇحامەدجانوۆ، ش. ايتماتوۆتىڭ «كوكتوبەدەگى كەزدەسۋىندە» يوسيف تاتايەۆيچ، شەكسپيردىڭ «يۋلي تسەزارىندە» يۋلي تسەزار، م. فريشتىڭ «دون جۋاننىڭ دۋمانىندا» دون جۋان، ءا. نۇرپەيىسوۆتىڭ «قان مەن تەرىندە» ەلامان سىندى كەيىپكەرلەرىن سومداعان.

ودان بولەك گ. گاۋپتماننىڭ «ىمىرتتاعى ماحاببات» دراماسىنداعى دوكتور كلاۋزەن ءرولىن اسقان شەبەرلىكپەن سومداپ، تەاتر تاريحىنان ويىپ ورىن العان تۇلعا. سەكسەننىڭ سەڭگىرىن باعىندىرعان تۇلعا كينو مەن تەاتر ونەرىنە سىڭىرگەن ەڭبەگى ءۇشىن كەڭەس وداعى جانە قازاقستاننىڭ حالىق ءارتىسى، كەڭەس وداعى جانە قازاقستان مەملەكەتتىك سىيلىقتارىنىڭ، تاۋەلسىز «تارلان» سىيلىعىنىڭ لاۋرەاتى اتانىپ، «وتان»، «قۇرمەت» وردەندەرىنىڭ، يۋنەسكو-نىڭ الەم كينوسى الدىنداعى ەڭبەگى ءۇشىن بەرىلگەن «التىن قىران» وردەنىن يەلەنگەن.