ناۋرىزداعى مەرەكەلەرگە وراي ەلوردادا مادەني- بۇقارالىق شارالار وتەدى

استانا. قازاقپارات - حالىقارالىق ايەلدەر كۇنى قۇرمەتىنە قالانىڭ مادەني مەكەمەلەرىندە ەلوردا تۇرعىندارى مەن قوناقتارى ءۇشىن وننان استام مادەني- بۇقارالىق شارالار جوسپارلانعان،

دەپ حابارلايدى استانا اكىمدىگىنىڭ باسپا ءسوز قىزمەتى.

قالا تۇرعىندارى ءۇشىن «جىگىتتەر» توبىنىڭ ەسەپتىك كونسەرتى ناعىز سىي بولماق، ول 8 - ناۋرىز كۇنى «استانا» كونسەرت زالىندا ساعات 16:00-دە جانە 19:00-دە وتەدى.

مەرەكەلەۋ شەڭبەرىندە مۋزەيلەردە، كىتاپحانالاردا، تەاترلاردا، كونسەرت زالدارىندا جانە تاۋەلسىزدىك سارايىندا تاقىرىپتىق كورمەلەر، سپەكتاكلدەر جانە كونسەرتتەر ۇيىمداستىرىلادى.

استانا قالاسى مادەنيەت، مۇراعاتتار جانە قۇجاتتاما باسقارماسىنىڭ اقپاراتى بويىنشا، ناۋرىز مەيرامىن مەرەكەلەۋ اياسىندا استانادا 20-عا تارتا مادەني شارا وتكىزىلەدى. نەگىزگى مەرەكەلىك شارالار اشىق الاڭداردا ۇيىمداستىرىلادى. ال مەيرامنىڭ شارىقتاۋ شەگى 21-23 - ناۋرىز كۇندەرى «حان شاتىر» ساۋدا ويىن- ساۋىق ورتالىعى ماڭىندا، «قازاق ەلى» الاڭىندا، قالالىق الاڭدا، «ستۋدەنتتەر» باعىندا، «جاستار» تەاترىنىڭ (ۆوكزال اۋدانى) الدىندا جانە قالانىڭ بارلىق تۇرعىن الاپتارىندا وتەتىن حالىقتىق سەرۋەندەر بولماق.

بۇدان باسقا، مەرەكە كۇندەرى قالا تۇرعىندارى مەن قوناقتارى ءۇشىن قالا تەاترلارىندا كونسەرتتەر، سپەكتاكلدەردىڭ پرەمەرالىق كورسەتىلىمدەرى، كورمەلەر ۇيىمداستىرىلادى.

اتاپ ايتقاندا، «استانا» كونسەرت زالىندا 23 - ناۋرىزدا «شانشار» ساتيرا جانە ءازىل كەشى وتسە، 25 - ناۋرىزدا «شالقىما» حالىق بي ءانسامبلىنىڭ، «راۋان» بي ءانسامبلىنىڭ، كلاسسيكالىق جانە ەسترادالىق ۆوكال سوليستەرىنىڭ قاتىسۋىمەن «بي الەمى» كونسەرتى وتەدى.

ەلوردانىڭ قۋىرشىق تەاترىندا «ناۋرىز تۋرالى اڭىز»، «قاڭباق شال» جانە «پريكليۋچەنيا ناۋرىزبەكا» ەرتەگىلەرى قويىلادى. ورىس دراما تەاترى دا كىشكەنتاي كورەرمەندەر ءۇشىن مازمۇندى باعدارلاما ۇسىنباق. ناۋرىز مەيرامىنا وراي تەاتر «دوميك دليا تساريا زۆەرەي» جانە «الەنكيي تسۆەتوچەك» اتتى ەرتەگىلەر ساحنالانادى.