استانادا تۋريستەرگە ارنالعان ءبىرىڭعاي ەلەكتروندى كارتالار شىعارىلادى

استانا. قازاقپارات - استاناعا كەلگەن تۋريستەرگە ىڭعايلى بولۋ ءۇشىن ءبىرىڭعاي ەلەكتروندى كارتا پايدا بولادى، دەپ حابارلايدى «قازاقپارات» ح ا ا ءتىلشىسى استانا كونۆەنشن بيۋرو ديرەكتورى سانيار ايتەكەنوۆكە سىلتەمە جاساپ.

«بۇل ءۇشىن ۇزاق ەڭبەك ەتتىك، ەندى مىنە، ناتيجەگە دە قول جەتكىزدىك. جاقىندا استانادا تۋريستەرگە ارنالعان ءبىرىڭعاي ەلەكتروندى كارتا شىعارىلادى. «Astana CityPASS»- تۋريستەرگە ارنالعان ەلەكتروندى كارتا تۇرىندەگى قالانىڭ تۋريستىك يندۋسترياسىنا ارنالعان ءبىرىڭعاي ءونىم. بۇل كارتامەن مۋزەيلەرگە، قالانىڭ بەتكە ۇستار نىساندارىنا بارۋعا بولادى، ەكى قاباتتى اۆتوبۋسىندا، ەسىل كەمەسىنىڭ بورتىندا ەكسكۋرسيا جاساۋعا بولادى»، - دەپ جازدى سانيار ايتەكەنوۆ الەۋمەتتىك جەلىگە.

ونىڭ حابارلاۋىنشا، بۇل جيناق ءۇش تىلدەگى جولباسشىمەن، قالا كارتاسىمەن، جەڭىلدىكتەر تۋرالى اقپارات جانە سيم-كارتامەن تولىقتىرىلعان.

«قازىر ءبىز CityPASS ىشىندەگى Recommended by EXPO-2017 قالانىڭ سەرىكتەس مەكەمەلەرىمەن جەڭىلدىكتەردى ينتەگراتسيالاۋ جۇمىستارى ءجۇرىپ جاتىر»، - دەپ تولىقتىردى استانا كونۆەنشن بيۋرو ديرەكتورى.

استانا كونۆەنشن بيۋرو - استانا قالاسىنىڭ ينۆەستيتسيالار جانە دامۋ باسقارماسى قۇرىلىمىنداعى ج ش س، ول ەلوردانىڭ تۋريستىك سالاسىن جوسپارلاۋ، دامىتۋ بويىنشا نەگىزگى ۇيىم بولىپ سانالادى.