مۇرات ابەنوۆ جەمقورلىققا قارسى كۇرەستە گرۋزيا تاجىريبەسىن ايتىپ بەردى
«دوستار» مادەنيەت سارايىندا ۇيىمداستىرىلعان شاراعا وبلىس اكىمىنىڭ ورىنباسارى ن. نۇركەنوۆ، قوعام قايراتكەرى مۇرات ابەنوۆ جانە «ءبىرىنشى جەمقورلىققا قارسى مەديا ورتالىق» رەسپۋبليكالىق قوعامدىق بىرلەستىگىنىڭ وكىلدەرى قاتىستى.
فورۋمدا ءسوز سويلەگەن مۇرات ابەنوۆ گرۋزيا ەلىنىڭ جەمقورلىقپەن كۇرەسۋدەگى تاجىريبەسىمەن ءبولىستى. «گرۋزيادا بىرنەشە جىلدان بەرى پارلامەنتتىڭ كۇنتارتىبىندە قارالاتىن زاڭ جوباسىنا قوعامدىق مونيتورينگ جۇرگىزىپ وتىراتىن ارنايى مەملەكەتتىك ورگان جۇمىس ىستەيدى. مينيسترلىكتەر مەن قوعام وكىلدەرى ازاماتتارمەن كەزدەسىپ، زاڭ جوباسىن تالقىلاپ وتىرادى»، - دەدى ول.
ال، اقمولا وبلىسى اكىمىنىڭ ورىنباسارى ن. نۇركەنوۆ وڭىردە 2015-2020 -جىلدارعا ارنالعان جەمقورلىققا قارسى ستراتەگيانى جۇزەگە اسىرۋدىڭ باستى باعىتتارى تۋرالى ايتىپ بەردى. ونىڭ سوزىنشە، وڭىردە جەمقورلىق قۇقىق بۇزۋشىلىقتى انىقتاپ، جولىن كەسۋ باعىتىندا اۋقىمدى شارالار جۇزەگە اسىرىلۋدا. وعان قوسا، بيزنەس جانە تۇرعىندارمەن جۇمىس جۇرگىزۋدە جەمقورلىققا جول اشاتىن اكىمشىلىك كەدەرگىلەردى ازايتۋ دا قولعا الىنعان. سونىمەن قاتار، «ءبىرىنشى جەمقورلىققا قارسى مەديا ورتالىق» رەسپۋبليكالىق قوعامدىق بىرلەستىگىنىڭ ءتوراعاسى تولەگەن بايعۇلوۆ جانە «نۇر وتان» پارتياسىنىڭ وبلىستىق فيليالى ءتوراعاسىنىڭ ءبىرىنشى ورىنباسارى عالىم بەكماعامبەتوۆ تە ءوز ويلارىمەن ءبولىستى.