ماڭعىستاۋ تۇيەلەرىنىڭ ءسۇتى اراب امىرلىكتەرىنە جول تارتادى - فوتو
دۋباي قالاسىندا «بولاشاق» اۋىلشارۋاشىلىق وندىرىستىك كووپەراتيۆى وكىلدەرىنىڭ قاتىسۋىمەن وتكەن وتاندىق تاۋار وندىرۋشىلەر فورۋمىندا ماڭعىستاۋلىق فەرمەرلەر جەتكىزىلىم بويىنشا الدىن الا كەلىسىمدى الدى، دەپ حابارلايدى «قازاقپارات» ح ا ا ءتىلشىسى.
فورۋمدى KAZNEX INVEST ەكسپورت جانە ينۆەستيتسيالار ۇلتتىق اگەنتتىگىنىڭ وكىلدەرى ۇيىمداستىردى. «قازىر ب ا ءا نارىعىنا شىعۋ مۇمكىن بولماي وتىر. ونىڭ بىرنەشە سەبەپتەرى بار. بىرىنشىدەن، لوگيستيكا. ەگەر اۋەتاسىمالىن قولدانار بولساق، بۇل وزىندىك قۇنعا اسەر ەتەدى. ال، ەگەر اۆتوكولىكتى پايدالانساق ەكى ەل - تۇركىمەنستان مەن يران ارقىلى وتۋگە تۋرا كەلەدى. ەكىنشىدەن، ب ا ءا- دەگى سەرتيفيكاتتاۋ جانە ستاندارتتاۋ جۇيەسىنىڭ تالاپتارى جوعارى. ال، وعان ءبىزدىڭ فەرمەرلەر ازىرگە دايىن ەمەس. ول ءۇشىن قىمبات قۇرىلعىلار قاجەت. قورىتىندىلاي ايتساق، ازىرگە ءبىزدىڭ تاۋارلار ب ا ءا نارىعىنداعى جەرگىلىكتى تاۋارلارمەن باسەكەلەسە المايدى. الايدا، ءبىز امىرلىك تۇرعىندارىنا ساپالى سۋسىندى - مايلى تۇيە ءسۇتىن ۇسىنا الامىز. بۇل - جەرگىلىكتى تۇرعىندار مەن كاسىپكەرلەر باعالايتىن باستى ەرەكشەلىگىمىز. وسى ۋاقىت ىشىندە بارلىق ماسەلەلەردى شەشىپ، ءسۇت تاسىمالداۋدى باستايمىز دەپ ويلايمىن. بۇل - شۇبات ەمەس، تۇيە ءسۇتى»، - دەپ اتاپ ءوتتى بولاشاق» اۋىلشارۋاشىلىق وندىرىستىك كووپەراتيۆىنىڭ باسقارما ءتوراعاسى اسەت مانوۆ.
ماڭعىستاۋلىق جانە اراب كاسىپكەرلەرىنىڭ B2B فورماتىنداعى سوڭعى كەزدەسۋىندە 10 كومپانيا قىزىعۋشىلىقتارىن ءبىلدىردى. salikomall.com ساۋدا الاڭى ءوز قىزمەتىن ۇسىنىپ ۇلگەردى.
ايتا كەتەيىك، ماڭعىستاۋلىق تۇيە سۇتتەرىنىڭ مايلىلىعى %6-7 عا جەتەدى، ال ب ا ءا- دە بۇل كورسەتكىش تەك %3-4- دى قۇرايدى. ق ر ۇلتتىق ەكونوميكا مينيسترلىگى ستاتيستيكا كوميتەتىنىڭ دەرەگىنە سايكەس، ەلدەگى تۇيەلەردىڭ 30 پايىزى ماڭعىستاۋ وبلىسىندا وسىرىلۋدە.