الەمدىك كومپانيالار ديماشقا جارناماعا ءتۇسۋ ۇسىنىستارىن جاۋدىرا باستادى
بۇل تۋرالى تىلشىلەرگە ديماشتىڭ رەسمي وكىلى الپامىس ءشارىموۆ ايتىپ بەردى،دەپ حابارلايدى قازاقپارات.
ءانشىنىڭ رەسمي وكىلى سونداي- اق قىتايدا ديماشتىڭ سۋرەتى نەگە جارناماعا اينالعانىن، ال، قازاقستاندا بۇنداي ءۇردىس نەگە بايقالماي جاتقانىن ءتۇسىندىردى. ونىڭ ايتۋىنشا، قىتايدا ميللياردتاعان حالىق تۇرادى، سوندىقتان، ادامنىڭ سۋرەتىن رۇقساتسىز پايدالانعانداردى «اڭدۋ» ءتىپتى مۇمكىن ەمەس ەكەن.
«قىتايدا بۇنى باقىلاۋ قيىن. ميللياردتاعان حالىق. ولاردىڭ ارقايسىسىمەن سوتتاسۋ مۇمكىن ەمەس. سوندىقتان، بۇل بەيرەسمي دۇنيەلەر. فاناتتاردىڭ شىعارىپ جاتقان دۇنيەلەرى بىزگە ۇنايدى»، - دەيدى ول.
الپامىس ءشارىموۆتىڭ ايتۋىنشا، قازىر ديماشقا ءارتۇرلى كومپانيالاردان ۇسىنىستار ءتۇسىپ جاتىر. «برەندتى كومپانيالاردان ۇسىنىستار ءتۇستى، قازىر كەلىسسوزدەر ءجۇرىپ جاتىر. قورىتىندىسىن حاباردار ەتەمىز»، - دەدى ءانشىنىڭ رەسمي وكىلى.
اۆتور: كەنجەكەي توقتامۇرات قىزى