رەسەي ۋادەسىن ورىنداماسا، سيريا وپپوزيتسياسى استاناعا كەلۋدەن باس تارتپاق
وپپوزيتسيا باسشىسى سونداي-اق كەلىسسوزدەردەن يراندى شەتتەتۋگە شاقىرعان. اللۋشتىڭ ايتۋىنشا، وپپوزيتسيالىق دەلەگاتسيا استانا پروتسەسىنىڭ ءبىرىنشى جانە ەكىنشى راۋندتارىنا اتتانعان كەزدە تاراپتار ءبىر مامىلەگە كەلەدى دەپ قاتتى ۇمىتتەنگەن. "16-17 -اقپان كۇندەرى استانادا وتكەن كەزدەسۋ كەزىندە رەسەي دەلەگاتسياسىنىڭ باسشىسى الەكساندر (لاۆرەنتەۆ - اگەنتتىك) ق ر سىرتقى ىستەر ءمينيسترى ورىنباسارىنىڭ كوزىنشە ماعان اۋەدەن سوققى بەرۋدى توقتاتامىز دەپ ۋادە بەرگەن. الايدا، ءبىز استانادان ورالعان كەزدە اۋەسوققىلار ءتىپتى جيىلەپ كەتتى. ءبىز تۇركيا تاراپى ارقىلى قارسىلىق نوتاسى مەن ەكى كۇندەگى اۋە سوققىلارىنىڭ سانىن جىبەردىك»، - دەيدى اللۋش ب ۇ ۇ قامقورلىعىنىڭ اياسىندا جەنەۆادا ءوتىپ جاتقان سيرياارالىق كەلىسسوزدەر كەزىندە ءسوز الا وتىرىپ. ەندى ناۋرىز ايىندا استانادا وتەدى دەپ جوسپارلانعان استانا پروتسەسىنىڭ ءۇشىنشى راۋندى وتە مە، جوق پا، وتسە، سيريا وپپوزيتسياسى قاتىسا ما، جوق پا دەگەن ماسەلەلەر تۋىنداپ وتىر.
«الىپ قاراساق، ورىستاردىڭ بىزگە قاتىستى ايتقان ءسوزى شىندىققا جاناسپايدى. مەن ولاردى بەرگەن ۋادەلەرىن ورىنداۋعا شاقىرامىن جانە يراندى كەلىسسوزدەردەن شەتتەتۋگە شاقىرامىن. ەگەر دە رەسەي بۇنىڭ الدىنداعى ۋادەلەرىن ورىنداماسا، ءبىز استاناعا بارمايمىز»، - دەگەن ول جۋرناليستەردىڭ سۇراعىنا جاۋاپ بەرە وتىرىپ.
اۆتور: كەنجەكەي توقتامۇرات قىزى