قازاقستاندىق مانەرلەپ سىرعاناۋدىڭ جۇلدىزى دەنيس تەن ازيا ويىندارىندا جۇلدەسىز قالدى

ساپپورو. قازاقپارات - بۇگىن جاپونيانىڭ ساپپورو قالاسىندا قازاقستاندىق مانەرلەپ سىرعاناۋدىڭ جۇلدىزى، سوچي وليمپياداسىنىڭ قولا جۇلدەگەرى دەنيس تەن ازيادا-2017 ويىندارىن جۇلدەسىز اياقتادى، دەپ حابارلايدى ساپپوروداعى قازاقپارات ءتىلشىسى.

تەن بۇگىن ەركىن باعدارلامادان بار جوعى 125,90 ۇپاي جينادى. ال وسىدان ەكى كۇن بۇرىن وتكەن قىسقا باعدارلامادا 72,98 بالل ۇپاي ەنشىلەپ، توعىزىنشى ورىنعا تابان تىرەگەن ەدى. قوسسايىستىڭ قورىتىندىسى بويىنشا 198,88 ۇپاي جيناعان سپورتشىمىز ازيادا ويىندارىن جۇلدەسىز اياقتادى.

ەسكە سالا كەتەيىك، دەنيس تەن جاقىندا عانا الماتىدا وتكەن 28-قىسقى ۋنيۆەرسيادانىڭ چەمپيونى اتانعان بولاتىن. وندا قىسقا باعدارلاما بويىنشا 94,91 ۇپاي ناتيجەسىمەن كوش باستاپ تۇرعان. ال ەركىن باعدارلامادا تورەشىلەر قازاقستاندىققا 172,06 ۇپاي بەردى. ەكى باعدارلامانىڭ قورىتىندىسى بويىنشا، تەن 266,97 ۇپاي جيناپ، ءبىرىنشى ورىن العان ەدى.

اۆتور: كۇنسۇلتان وتارباي