سيريالىق وسكار ۇمىتكەرىنە ا ق ش- قا كىرۋگە رۇقسات بەرىلمەدى

استانا. قازاقپارات - «وسكار» بايقاۋىنا ۇسىنىلعان «اق دۋلىعالىلار» اتتى گۋمانيتارلىق ۇيىم تۋرالى تۇسىرىلگەن فيلمنىڭ سيريالىق وپەراتورى حالەد حاتيبكە ا ق ش اۋماعىنا ەنۋىنە رۇقسات بەرىلمەدى، دەپ حابارلايدى بي- بي- سي اگەنتتىگى.

اسسوشيەيتەد پرەسس اگەنتتىگىنىڭ حابارلاۋىنشا، بۇعان دەيىن 21 جاستاعى وپەراتورعا امەريكالىق ۆيزا بەرىلگەن، ءبىراق ىستانبۇلدان لوس- اندجەلەسكە ۇشاتىن «Turkish Airlines» اۋە كومپانياسىنىڭ ۇشاعىنا وتىرۋعا رۇقسات بەرىلمەگەن.

 اگەنتتىك دەرەكتەرىنە سايكەس، ا ق ش ىشكى قاۋىپسىزدىك مينيسترلىگى وپەراتورعا قاتىستى قانداي دا ءبىر «جايسىز اقپارات» ەستىپ، حاتيبتى ەل اۋماعىنا كىرگىزۋدەن سوڭعى ساتتە باس تارتقان. اسسوشيەيتەد پرەسستىڭ جازۋىنشا، مۇنىڭ استارىندا لاڭكەستەرمەن بايلانىستان باستاپ، قاراپايىم ۆيزالىق رەجيمدى بۇزۋعا دەيىن ءتۇرلى سەبەپتەر بولۋى مۇمكىن.

«قۇراما شتاتتارعا بارۋ ءۇشىن قولدانىستاعى جول ءجۇرۋ قۇجاتتارى بولۋى ءتيىس»، - دەدى رەسمي تۇسىنىكتەمە بەرگەن ىشكى قاۋىپسىزدىك مينيسترلىگىنىڭ وكىلى جيلليان كريستينسەن.

وقيعا ا ق ش پرەزيدەنتى دونالد ترامپتىڭ يسلام ءدىنىن ۇستاناتىندار كوپ شوعىرلانعان جەتى مەملەكەتتىڭ ازاماتتارىنا ەلگە كەلۋگە تىيىم سالاتىن جارلىققا قول قويۋىنان تۋىنداپ وتىر.

Netflix تۇسىرگەن «اق دۋلىعالىلار» لەنتاسى «ۇزدىك قىسقامەتراجدى دەرەكتى فيلم» نوميناتسياسى بويىنشا «وسكارعا» قاتىستىرىلۋدا.

 40 مينۋتتىق لەنتادا تۇركياداعى وقىتۋ ورتالىعىنان سيرياعا، بومبا استىندا قالعان تۇرعىنداردى قۇتقارۋعا اتتانعان ۇيىمنىڭ ءۇش ەرىكتىسى جايلى باياندالادى.