الماتى قالاسى ەل ەكونوميكاسىنىڭ بەستەن ءبىر بولىگىن قۇرايدى
ال باسپانا بويىنشا ءار قالا تۇرعىنىنا شاقساق، جان باسىنا 2 شارشى مەتردەن كەلىپتى. ارۋ الماتىنىڭ 1935 - جىلعى جانە بيىلعى ەسەبىن تالداپ- تارازىلاپ كورگەن ءتىلشىنىڭ رەپورتاجى.
ارشىن كەمەلجان، ءتىلشى:
- 1935 -جىلى الماتى قالاسىندا بار بولعانى 217800 ادام تۇرعان. ونىڭ 55 مىڭى وزگە وڭىرلەر مەن ەلدەردەن قونىس اۋدارىپ كەلىپتى. ياعني سول جىلدارى ءسىبىر مەن بارناۋىلدان كوپتەپ جەر اۋدارىلعان. جيىرماسىنشى عاسىردىڭ ءبىرىنشى جارتىسىنداعى الماتى قالاسىنىڭ اۋماعى بار بولعانى 4500 گەكتار بولدى. ونىڭ 1900 گەكتارى تۇرعىن ۇيلەردىڭ ۇلەسىنە تيەسىلى. حالىقتىڭ تورتتەن ءبىر بولىگى تۇراقتى جۇمىسپەن قامتىلعان. ولاردىڭ باسىم بولىگى ءوندىرىس ورىندارىندا ەڭبەك ەتكەن.
بوريس جاپپاروۆ، ق ر پرەزيدەنتى مۇراعاتىنىڭ ديرەكتورى:
- 1935 - جىلى الماتى قالاسىنىڭ جالپى ءونىم كولەمى 134 ميلليون 327 مىڭ رۋبلگە جەتكەن. ونىڭ ىشىندە مەملەكەتتىك ءوندىرىس ورىندارىنىڭ ۇلەسى 114 ميلليون رۋبل كووپەراتيۆتىك مەكەمەلەردىڭ ۇلەسى 14 ميلليون رۋبل سول ۋاقىتتا قالادا 5 بانك جۇمىس ىستەگەن. ونداعى تۇرعىنداردىڭ دەپوزيتى 9 ميلليون رۋبلدەن اسقان. سەكسەن ەكى جىل بۇرىن باسپانا بويىنشا ءار تۇرعىنعا 2 شارشى مەتردەن كەلگەن.
ال قازىر ءار الماتىلىققا ورتا ەسەپپەن 27 شارشى مەتردەن كەلەدى. وتكەن جىلدىڭ وزىندە ءۇي كەزەگىندە تۇرعاندارعا ءارتۇرلى باعدارلامالار ارقىلى 14 مىڭ پاتەر ۇلەستىرىلگەن. بۇگىندە قالانىڭ حالىق سانى 1 ميلليون 700 مىڭ ادامنان استى. الماتىنىڭ رەسپۋبليكالىق قازىناعا قوسقان ۇلەسى 1 تريلليون 259 ميلليارد تەڭگەگە جەتكەن. ايتا كەتكەن ءجون، الماتى قالاسى ەل ەكونوميكاسىنىڭ بەستەن ءبىر بولىگىن قۇرايدى.
باۋىرجان بايبەك، الماتى قالاسىنىڭ اكىمى:
- ەلىمىزدەگى نەسيەلىك ۇلەستىڭ 60 پايىزى الماتىعا تيەسىلى. وتكەن جىلى 455-تەن اسا جەكە جانە توپتىق كەلىسىم جاسالعان. ىشكى ساۋدا اينالىمىنىڭ 20 پايىزى الماتىنىڭ ەنشىسىندە. قالاداعى ساۋدا مەن قىزمەت كورسەتۋ 80 پايىزعا جەتتى.
جالپى الماتى قالاسىنىڭ باسقارۋ جۇيەسى ءبىر عاسىردان بەرى وزگەرمەگەن. قالاداعى ماڭىزدى سالالاردى قولداۋ جيىرماسىنشى عاسىردان باستاپ قولعا الىنعان. ياعني جول، كولىك، باسپانا جانە جۇمىسپەن قامتۋ تۇراقتى قولداۋ تاۋىپ كەلەدى.
اۆتورلارى: ارشىن كەمەلجان، نۇرداۋلەت جاقسىبايەۆ
www.24.kz