ءبىر ءانشىنىڭ ىشىندە ءۇش ءانشى تۇرعان سياقتى
تانىمال ونەرلى جۇپ - قانات جانە سۆەتا ايتبايەۆتاردىڭ ۇلى ديماش قۇدايبەرگەننىڭ قىتايداعى «Singer-2017» انشىلەر بايقاۋىنا قاتىسىپ جاتقانىنا ءبىراز بولدى. بۇگىنگە دەيىن سايىستىڭ التى تۋرىنان ءوتىپ، ونىڭ ۇشەۋىندە ءبىرىنشى ورىن العانى دا ءمالىم.
ديماشتىڭ ونەرىنە ءتانتى بولعان كوپشىلىك، مىنە، ءبىر ايدان بەرى الەۋمەتتىك جەلىلەردە ءوز پىكىرلەرىن ءبىلدىرىپ، ريزاشىلىقتارىن ايتىپ، تالقىعا سالىپ جاتىر. انشىلەر سايىسىنىڭ ءار كەزەڭىن اسىعا كۇتەتىندەر دە بارشىلىق. قازاقتان شىققان جاس دارىننىڭ قادامىنا رازى جۇرتشىلىق تەك ءوز ەلىمىزدە عانا ەمەس، شەت ەلدەردە دە جەتكىلىكتى ەكەن. ديماشتىڭ انشىلىك تالانتىنا الەم تىڭدارماندارىن ءتانتى ەتۋگە فەيسبۋك الەۋمەتتىك جەلىسىنىڭ دە كوپ اسەر ەتىپ جاتقانى انىق. ويتكەنى، ونىڭ ءان شىرقاپ تۇرعان بەينەكورىنىسى عالامتور ارقىلى دۇنيەجۇزى كورەرمەندەرىنىڭ نازارىنا ۇسىنىلۋدا.
ماسەلەن، ديماش قۇدايبەرگەننىڭ قىتايداعى بايقاۋدا العاش شىرقاعان «S. O. S» ءانىنىڭ بەينەنۇسقاسىن كۇنى كەشەگە دەيىن 5 ميلليوننان استام ادام كورىپتى! 130 مىڭنان اسا ادام بەينەروليكتى ءوز پاراقشالارىندا دوستارىمەن بولىسكەن. ولاردىڭ استىندا 7 مىڭعا تاياۋ پىكىر جازىلعان. ەرەكشە ءبولىپ ايتار ءبىر ءجايت: پىكىر قالدىرۋشىلاردىڭ باسىم كوپشىلىگى - باتىس ەلدەرىنىڭ ازاماتتارى ەكەن (قىتايدا فەيسبۋك جوق، وعان تىيىم سالىنعان).
تومەندە ەڭ اسەرلى پىكىرلەردىڭ ءبىر توبىن قازاقشالاپ ۇسىنىپ وتىرمىز:
«جوناتان مالنۋري (فرانسيا): كەمەلىنە كەلگەن كەرەمەت داۋىس! دىبىستاردى ءدال ايتۋدا جىبەرگەن كەيبىر كەمشىلىكتەرى كەشىرىمدى. كەۋدە تۇكپىرىنەن شىعاتىن ءۇن مەن رەگيستردى تاماشا پايدالانادى ەكەن. عاجاپ!»
«روبين ۋيليامسون (ا ق ش): مەن مىنا جىگىتتىڭ كىم ەكەنىن دە، مۇنىڭ قانداي شوۋ ەكەنىن دە بىلمەيمىن. بىلەتىنىم: ءانشىنىڭ دياپازونى سۇمدىق! جانە وسى سۇمدىق دياپازوندى ول قالاي اۋەلەتەدى دەسەڭشى! فەنومەن!»
«كارمەن فەرناندەس انسۋاتەگي (يسپانيا): داۋىس... جۇرەكتەردى جاقىنداتاتىن ەڭ كۇشتى قۇرال. مىناداي كەڭ دياپازون قالاي جاقىنداتپاسىن...»
«يزابەل شوففەتون (فرانسيا): مەن بۇل ۆيدەونى ءتورت رەت كورىپ شىقتىم. ءسىرا، دانيەل بالاۆۋان جۇماقتا ءوز ءانىن مىناداي بالانىڭ شىرقاعانىنا رازى بوپ جاتقان شىعار. مىنا ءانشى، ءسوز جوق، گەني. ناعىز گەني! راس، كەي سوزدەردى دۇرىس ايتپادى، ءبىراق، وندا تۇرعان نە بار، باستىسى - ەموتسيا شىنايى جانە كۇشتى!»
«كريستين وربست (گەرمانيا) : ءماسساعان، مىنا جىگىتتىڭ كومەيىندە تەنور مەن سوپرانونىڭ اراسىنداعى، ەرگە ءتان داۋىس پەن ايەلگە ءتان ءۇن اراسىنداعى بۇكىل دىبىستار گامماسى تۇگەل ءجۇر عوي! تۇلا بويىم تىتىركەنىپ كەتتى».
«سيلۆانيا بايلاندو (يتاليا): سيرەك كەزدەسەر ايرىقشا داۋىس ەكەن. كىمدە- كىم مىنا ءانشىنىڭ اتى- ءجونىن بىلسە، ماعان ايتسىنشى».
«يان ستيۋارت ( ۇلى بريتانيا): قۇدايىم- اۋ، قانداي عاجاپ! قايتا- قايتا تىڭداپ وتىرمىن. وسىنداي دا داۋىس بولۋى مۇمكىن بە؟ «مۇمكىن» دەيتىن شەكتەن دە شىعىپ كەتكەن دياپازون عوي مىناۋ! جاراتقاننىڭ ءوزى بەرگەن دارىن. قۋانىشىم كەۋدەمە سىيار ەمەس. ۆيدەونى بولىسكەندەرىڭىزگە راحمەت».
«مارسيا نيكايدو (برازيليا): بۇل سايىس ەمەس شىعار دەپ ۇمىتتەنەمىن. ەگەر سايىس بولسا، وندا باسقا قاتىسۋشىلارعا جاسالعان ادىلەتسىزدىك بۇل. مۇنىمەن جارىسۋعا كىمنىڭ شاماسى كەلەدى؟ قۇددى ءبىر ءانشىنىڭ ىشىندە ءۇش ءانشى تۇرعان سياقتى. عاجاپ!»
«تۋۋلا حاستباككا (فينليانديا): ادام سەنگىسىز رەگيستر، تۇنىق تا كەڭ داۋىس، كەرەمەت ينتەرپرەتاتسيا. مىقتى ءانشى ەكەن!»
«اگنەس داني دە بوس (بەلگيا): قانداي كۇشتى داۋىس... قۇدايدىڭ بەرگەن سىيى عوي... جىلاپ وتىرمىن، كوزىمنىڭ جاسىن تىيا الار ەمەسپىن... كەرەمەت... كەرەمەت... كەرەمەت...»
«ۆيكتوريا مورتەنسەن (دانيا): قانداي تالانت، قانداي ءانشى! ريزامىن! كاسىبي تۇرعىدان وسە بەرۋىنە، كەمەلدەنە بەرۋىنە تىلەكتەسپىن! ءبارى جاقسى بولسىن!»
«كريستينا دەلمەندو (ا ق ش): كۇلسەڭىزدەر، كۇلە بەرىڭىزدەر، ءبىراق، مەن ءاننىڭ ءبىر ءسوزىن دە تۇسىنگەن جوقپىن، ەسەسىنە، داۋىس قانداي تاماشا! تىڭداپ وتىرىپ، كوزىمدى جۇمىپ ەدىم، كوڭىلىم بوساپ كەتتى. كوز جاسىم بەتىممەن تارام- تارام بوپ اعىپ جاتىر. تىلدىك كەدەرگى بار بولسا دا، مۋزىكا جۇرەكتەردى بىرىكتىرىپ، ولاردى مەيىرىم مەن بەيبىتشىلىككە ۇندەي الادى!»
«ەسا سەيتتۋ (شۆەتسيا): مەنىڭ بۇل ءاندى تىڭداپ وتىرعانىما بىرنەشە ساعات بولدى، ءتىپتى، توقتاي الار ەمەسپىن. ءاننىڭ نە تۋرالى ەكەنىن دە بىلمەيمىن. مىناۋ - ادامنىڭ ەمەس، پەرىشتەنىڭ داۋسى. مۋزىكا ارقىلى سوعىستى توقتاتۋعا بولا ما؟ ءيا، مىنا جىگىت توقتاتا الادى. مەن الەمنىڭ جەتى كەرەمەتى تۋرالى ەستىگەم، ءبىراق، مىنا ءانشىنىڭ عاجايىبى بارىنەن اسىپ تۇسەتىن سياقتى. مىناداي داۋىستى جاراتقان قۇدايعا ەندى سەنبەسىمە امال جوق!»
ال قىتايدىڭ وزىندە ديماشتىڭ تانىمالدىلىعى، ءتىپتى، تاڭقالارلىق ناتيجەگە جەتتى. ديماش قۇدايبەرگەننىڭ PR- مەنەدجەرى ءارى دوسى الپامىس شاريموۆتىڭ ايتۋىنشا، قىتايلىق جانكۇيەرلەر مەن تىڭدارماندار قازاق انشىسىنە ايرىقشا قولداۋ كورسەتىپ جاتقان كورىنەدى. «مۇنداي ىستىق ىقىلاس ونەر ادامىن جىگەرلەندىرىپ، شالقار شابىت بەرەدى» دەيدى ول.
ءۇندىنىڭ باياعى «ديسكو ءبيشىسى» فيلمىندە حالىقتىڭ عالامات قىزىعۋشىلىعىن وياتقان جاس ءانشى دجيمميدىڭ قۇرمەتىنە كيىم، ءيىسسۋ، بالمۇزداق شىعارىلىپ، ونى جۇرت تالاسا- تارماسا ساتىپ الىپ جاتۋشى ەدى عوي («دجينسى دجيممي، دۋحي دجيممي، موروجەنوە دجيممي» دەگەن سوزدەر ورتا بۋىن كورەرمەننىڭ ەسىندە بولار). سول سەكىلدى قىتايداعى اۋقاتتى جانكۇيەرلەر ديماشقا قولداۋ كورسەتۋ ءۇشىن ءۇي سىرتىنا جارىق شامدارمەن كومكەرىپ، ونىڭ اتىن جازىپ قويىپتى. ءتىپتى، جەرگىلىكتى IT- ماماندار ديماشتىڭ سمارتفوندارعا ارنالعان باعدارلاماسىن دا ويلاپ تاپقان. ديماشتىڭ سۋرەتى بار، قازاق تىلىندە «مەن سەنى سۇيەمىن» دەپ جازىلعان سىيلىق سالعىش قاپتار دا كەڭىنەن تارالىپ جاتىر ەكەن. سونداي- اق، قازاق ءانشىسىنىڭ تالانتىنا ءتانتى كەيبىر كورەرمەندەر ديماشتىڭ قۇرمەتىنە ارنايى پەچەنە دە شىعارىپتى.
«ارينە، كەز- كەلگەن ونەر ادامى ءۇشىن تىڭدارمان ىقىلاسىنىڭ ورنى بولەك. مۇنداي سىيلىقتار انشىگە ەرەكشە كوڭىل- كۇي سىيلايدى. ديماش ءوزىنىڭ جانكۇيەرلەرىن شىنىمەن دە جاقسى كورەدى»، - دەيدى ءانشىنىڭ PR- ديرەكتورى.
«الماتى اقشامى» گازەتى