يسەكەشيەۆ شەتەلدىكتەردى قازاقستانعا بوراتتىڭ ەمەس وزدەرىنىڭ كوزىمەن قاراۋعا شاقىردى
«ەكسپو قوناقتارىنا تولىققاندى شارالار باعدارلاماسى ازىرلەنۋدە. كورمە وتەتىن كەزەڭدە 500 دەن استام مادەني ويىن- ساۋىق شارالارىن وتكىزۋ جوسپارلانعان. ءبىز قازاق حالقى مادەنيەتىنىڭ بۇكىل تاريحىن، كوشپەلىلەر وركەنيەتىنىڭ مادەنيەتىن، سونىمەن بىرگە قازاقستاندا تۇرىپ جاتقان وزگە دە حالىقتاردىڭ مادەنيەتىن كورسەتكىمىز كەلەدى. سوندىقتان ەلوردا قوناقتارى ءۇشىن 3 اي بويى قازانات يپپودرومىندا شىعىس بازارى، زەرگەرلەر، ساحنا الاڭدارى بار ۇلكەن ەتنو اۋىل بولادى»، - دەدى اسەت يسەكەشيەۆ.
ونىڭ اتاپ وتۋىنشە، اتالعان ەتنو اۋىلدا ەلوردا قوناقتارى قولونەرشىلەردىڭ جۇمىستارىن، ات جارىسىن كورىپ، ۇلتتىق اس مازىرىنەن ءدام تاتا الادى، ۇلتتىق ويىندارعا قاتىسۋعا مۇمكىندىكتەرى بولادى.
«قۇرمەتتى دوستار، كوشپەلىلەر وركەنيەتىنىڭ بەسىگى، ۇلى دالا ورداسى جاڭا استاناعا قوش كەلدىڭىزدەر! «بوراتتىڭ» كوزدەرىنە ەمەس وزدەرىڭىزدىڭ سەزىمدەرىڭىز بەن كوزدەرىڭىزگە سەنىڭىزدەر. ءبىز بارلىقتارىڭىزدى كۇتەمىز»، - دەدى اسەت يسەكەشيەۆ.
ايتا كەتەرلىگى، ەكسپو-2017 حالىقارالىق مامانداندىرىلعان كورمەسى ۇستىمىزدەگى جىلدىڭ 10 - ماۋسىمىندا باستالىپ، 10 - قىركۇيەكتە اياقتالاتىن بولادى. كورمەگە 2 ميلليوننان استام ادام كەلەدى دەپ كۇتىلۋدە. ولار كورمەنى كەمىندە ەكى مارتە ارالايدى دەپ جوسپارلانعان. جالپى كورمەنى تاماشالاۋشىلاردىڭ 85 پايىزى قازاقستان ازاماتتارى، ال قالعان 15 پايىزىن شەتەلدىكتەر قۇرايدى. شەتەلدىكتەردىڭ باسىم بولىگىن ت م د ەلدەرىنىڭ جانە قىتايدىڭ ازاماتتارى قۇرايدى دەپ كۇتىلۋدە. قازىرگى ۋاقىتتا 112 مەملەكەت پەن 18 حالىقارالىق ۇيىم ەكسپو كورمەسىنە قاتىساتىندىعىن رەسمي تۇردە راستاپ وتىر.
اۆتور: مارلان جيەمباي