ەرتە «قارتايعان» ءتورت جاسار ەرنار اعىلشىن ءتىلىن ۇيرەنىپ ءجۇر - فوتو

استانا. قازاقپارات - استانادا تۇراتىن ءتورت جاسار ەرنار ەسىمدى بالا - وتە سۇيكىمدى ءارى اقىلدى.

تەك ول ۇزاق ۋاقىتتان بەرى، دالىرەك ايتساق، تۋعاننان بەرى قاتتى اۋىرىپ كەلەدى. قازاقپارات ءتىلشىسى ەرناردىڭ ۇيىنە قوناققا بارىپ، اناسى زەبينسا تولەبەرگەنوۆامەن اڭگىمەلەسىپ قايتتى. ەرنارعا ويىنشىق كولىكتى سىيعا تارتقانىمدا، ول بىردەن «و، ليمۋزين» دەپ، قۋانا كەتتى. ارتىنشا اناسى ەكەۋمىزدىڭ اڭگىمەمىزگە كەدەرگى جاساعىسى كەلمەي، كۇلگەن قالپىندا، تورگى ۇيگە اتتاندى.



اناسى زەبينسا بالاسىنىڭ سىرقاتى تۋعاننان كەيىن ءبىر ايدان سوڭ باستالعانىن ايتىپ وتىر. وكىنىشتىسى، ەرنارعا دارىگەرلەر ءبىر ەمەس، بىرنەشە وتە اۋىر دياگنوز قويعان. زەبينسانىڭ ايتۋىنشا، قازىر ول بالاسىنىڭ سىرت كەلبەتىنە ەمەس، ونىڭ ورگانيزمىندەگى باسقا سىرقاتتار ءۇشىن كوپ الاڭدايدى ەكەن.

«ەرنار - ەكىنشى بالامىز. تۇڭعىش قىزىمىز سەگىز ايىندا شەتىنەپ كەتتى. ەرنار 2012 -جىلى مامىردا تۋدى. قازىر ءتورت جارىم جاستا. ءبىز 2011 -جىلى جولداسىم ەكەۋمىز قازاقستانعا، استاناعا تاشكەنت قالاسىنان كوشىپ كەلدىك. ەرنار استاناعا كەلگەن سوڭ بويىما ءبىتتى، وسى قالادا بوساندىم. العاشقى قىزىم جۇرەك اقاۋىنان شەتىنەگەن سوڭ، تۋا سالا بالامنىڭ دەنساۋلىعىن سۇرادىم. ءبىراق، دارىگەرلەر ءبارى جاقسى، تەك «جارىعى» بار دەدى.

وكىنىشكە قاراي، ەرنار ءبىر ايعا تولعاندا العاشقى اۋرۋلار بىلىنە باستادى. ءبىر ايلىق بالانىڭ اسقازانىنا وپەراتسيا جاساتتىق... دارىگەرلەر «اسقازان مەن ىشەكتىڭ ءتۇيىلۋى» دەگەن دياگنوز قويدى. ءتورت ايعا تولعاندا دارىگەرلەر قايتا تەكسەرىپ، «باستاپقى گيپوتيرەوز» دەگەن دياگنوز قويدى. سودان بەرى، ءالى كۇنگە دەيىن گورمونالدى ءدارى قابىلداپ كەلەمىز، ەندوكرينولوگ ماماننىڭ تىركەۋىندە تۇرمىز. تۋا سالا، «جارىق» دەگەن دياگنوز قويعان بولاتىن، سەگىز ايىندا ءبىر، 1 جاس 3 ايىندا «جارىقتى» الۋ ءۇشىن ەكىنشى وپەراتسيا جاساتتىق.

سول وپەراتسيادان كەيىن، 2013 -جىلى ۇيدە نان جەپ ءجۇرىپ، قاتتى قاقالىپ، وتە اۋىر حالدە اۋرۋحاناعا تۇستىك. بالا ون كۇن بويى جاساندى جولمەن دەم الىپ جاتتى. ەم بەرگەن دارىگەرلەر «پنيەۆموبريوز» دەگەن دياگنوز قويدى»، - دەيدى ەرناردىڭ اناسى.

وسى اۋرۋلارمەن «كۇرەسىپ» جۇرگەن كەزدە، اناسى ەرناردىڭ بەتى مەن دەنەسىنەن ءاجىم بايقاعان. «1 جاسىندا اياعىن جاڭا باسىپ كەلە جاتقاندا، بەتى مەن دەنەسىنەن ءاجىم بايقاي باستادىم. بۇرىن قولىمدا كوتەرىپ جۇرگەندە نەمەسە جاتقىزعان كەزدە تەرىسى قاتتى بىلىنبەيتىن. ال، ءتاي-ءتاي باسىپ تۇرعان كەزدە، ءاجىم قاتتى بايقالدى. ەندوكرينولوگ دارىگەر ءبىزدى گەنەتيك دارىگەرگە جىبەرگەن ەدى.

گەنەتيك دارىگەر الدىن الا «سۋسىمالى تەرى سيندرومى» دەگەن دياگنوز بولۋى مۇمكىن ەكەنىن ايتتى. ءۇش جاسىنا دەيىن باقىلاپ، ءۇش جاسىندا قايتا تەكسەردى. وكىنىشكە قاراي، ەرنار وسى اۋرۋعا شالدىققان ەكەن...»، - دەيدى زەبينسا. 2014 -جىلى استانا قالاسىندا ورنالاسقان رەسپۋبليكالىق دياگنوستيكالىق ورتالىقتىڭ دارىگەرلەرى ەرنارعا تاعى ءبىر اتى جامان دياگنوز قويىپتى. «باستاپقى يممۋن تاپشىلىعى... ياعني، بالاعا تىنىس جەتپەيدى، ۇنەمى دەم الا الماي، قىسىلادى. ءتىپتى، كۇنىنە بىرنەشە رەت دەم الىسى قيىنداپ كەتەدى. سول كەزدە دارىگەرلەر «وكتاگام» دەگەن ءدارىنىڭ كومەكتەسەتىنىن ايتقان. 2014 -جىلعى ول ءدارىنىڭ بىرەۋى (ءبىر قورابى ەمەس، ءبىر فلاكونى - اگەنتتىك) 180 مىڭ تەڭگە تۇراتىن. بۇل ءدارىنى ءبىز پورتال ارقىلى دارىگەردىڭ قاراۋىنا جازىلىپ، اۋرۋحانادان تەگىن الا الامىز. الاتىن دا ەدىك... ءبىراق، ەرناردىڭ «ەرتە قارتايۋ» اۋرۋىنا بايلانىستى، تامىرلارى دا «سولىپ» قالعان.

جارىلىپ كەتە بەرەدى. جاي اناليز تاپسىرۋدىڭ ءوزى بىزگە قيىنعا سوعادى. تامىرى ءبىرىنشى رەتتەن تابىلماسا، ەكىنشى، ءۇشىنشى رەت ينە سالۋعا ۇلىمنىڭ تامىرى شىدامايدى. سوندىقتان، «وكتاگامدى» الا الماي جاتىرمىز. تامىرلارعا «دوستۋپ» جوق. ءبىراق، «وكتاگامنىڭ» كومەگى كوپ ەكەنىن بىردەن بايقادىم. سوڭعى ەكى جىلدا ءبىر-اق رەت الدىق، ءبىراق سول ءبىر رەت العاننان كەيىن ەرنار ءۇش اي (!) اۋىرمادى. تىنىس الۋى جەڭىلدەپ، اۋرۋلارعا توتەپ بەرە الدى. ءبىز ءۇشىن بۇل ەڭ باقىتتى ءۇش اي ەدى...»، - دەيدى قامكوڭىل انا.

«وكتاگام» - نان باسقا، ەرناردىڭ «قارتايۋىنا» دا توسقاۋىل قويا الاتىن، ونىڭ يممۋنيتەتىن كوتەرىپ، اۋرۋلارعا شىداس بەرە الاتىن ءدارى ««گامونورم» پرەپاراتى ەكەن. ەرنار ءۇشىن دارىگەرلەر بۇل ەكپەنى «ءومىر بويى قابىلداناتىن» ءدارى دەپ جازىپ بەرگەن «پرەپارات تەرىنىڭ استىنا ەگىلەتىن ينەكسيا. ول دا يممۋنيتەتكە. ول ءدارىنىڭ بىرەۋى 74 مىڭ تەڭگە تۇرادى. اپتا سايىن ءومىر باقي تاعايىندادى. ءبىر فلاكونى ءبىر پروتسەدۋراعا جەتەدى، ول 74 مىڭ تەڭگە تۇرادى. الىپ كورگەن جوقپىز. الساق، ول ءدارىنى كەم دەگەندە ءبىر جىل بويى ۇزبەي قابىلداۋ كەرەك. ايتپەسە، اقشا جەلگە ۇشادى»، - دەپ ءتۇسىندىردى زەبينسا.

تۋعاننان بەرى وسىنداي وتە اۋىر سىرقاتتارمەن كۇرەسىپ كەلە جاتقانىنا قاراماستان، ەرناردىڭ وتباسى تاتۋلىقتان تايماعان. قازىر زەبينسا مەن جولداسى ءۇشىن ەڭ ماڭىزدى ماسەلە - باسپانالى بولۋ. ويتكەنى، ەرناردىڭ يممۋنيتەتى وتە تومەن بولعاندىقتان، كەز كەلگەن نارسەگە، ءتىپتى، ءبىر تال قىلشىققا اللەرگيا بەرىپ، دەم الا الماي قالادى ەكەن.

قازىر ەرناردىڭ وتباسى «لەسوزاۆود» اۋدانىندا ەكى بولمەلى پاتەردىڭ ءبىر بولمەسىن جالداپ تۇرادى. «ەرنار ءتىپتى كىلەمنىڭ قىلشىعىنان اللەرگيا الادى، اۋىرىپ قالماۋدىڭ ەڭ ءبىرىنشى امالى - ول تازالىق پەن سانيتاريا بولىپ وتىر. ءبىراق، مىسالى، ەكىنشى بولمەنى جالدايتىن كىسىلەرگە كىلەمدەرىڭىزدى الىپ تاستاڭىزدار» دەپ ايتا المايمىن عوي... سوندىقتان، قالالىق اكىمدىككە ءوتىنىش جازىپ، جاۋابىن ۇزاق كۇتتىك. سودان كەيىن بۇقارالىق اقپارات قۇرالدارىنا شىقتىق. ءۇي-جاي ماسەلەسى بويىنشا كومەك بەرسە دەگەن نيەتپەن جاعدايىمىزدى حالىققا جاريا ەتتىك. 2014 -جىلدان بەرى ءۇي كەزەگىندە تۇرامىز، ءبىراق كەزەك وتە اقىرىن جىلجىپ كەلەدى. وسى جاعىنان قاتتى قينالامىز. ءوز ءۇيىمىز بولسا، بالاما ىڭعايلى جاعداي جاسايتىن ەدىم»، - دەيدى زەبينسا.

الەۋمەتتىك جەلىنىڭ ءبىر پايداسىن كورەيىن دەگەن نيەتپەن ەرناردىڭ اناسى ينستاگرام الەۋمەتتىك جەلىسىنەن پاراقشا اشىپ، ەرنار تۋرالى اقپارات سالىپ وتىرادى. https://www.instagram.com/pomosh_ernarchiku/ « ادامدار حابارلاسادى، كومەكتەسەدى. ءبىراق دارىگە جەتەتىندەي قاراجات جيناعان جوقپىز. بۇقارالىق اقپارات قۇرالدارىندا شىققاننان كەيىن تامارا قاسىم قىزى (بۇرىنعى دەنساۋلىق جانە حالىقتى الەۋمەتتىك قورعاۋ، قازىرگى ەڭبەك ءمينيسترى - تامارا دۇيسەنوۆا) ءبىزدى جەكە قابىلداۋىنا شاقىردى.

ول كىسى ۇيمەن دە، دارىمەن دە كومەكتەسەمىز دەپ ۋادە بەردى. ءبىراق، ءدارىنى ءالى العان جوقپىز. تامارا قاسىم قىزى وتە جۇمساق، تۇسىنىگى بار كىسى ەكەن. قازىر سول كىسىنىڭ تىكەلەي بۇيرىعىمەن وڭالتۋ ورتالىعىنا بارىپ ءجۇرمىز. «سوليەۆوي شاحتا» الامىز، ءۇش ساعات بويى پسيحولوگقا بارامىز، ماسساج الامىز»، - دەيدى ول.

ال، «ەرناردىڭ ەڭ باستى اۋرۋى - قارتايۋىنا ەم بار ما؟» دەگەن سۇراعىمىزعا اقىرىن كۇرسىنگەن انا: «تەرىسىن قالپىنا كەلتىرۋدىڭ ەمى جوق دەيدى. بۇل - گەنەتيك دارىگەرلەردىڭ تۇجىرىمى. 2014 -جىلى الماتىعا الىپ بارعان بولاتىنبىز. سول كەزدە دارىگەرلەر «وسى اۋرۋعا ازىرگە ەم جوق، بالاڭدى قيناما، اندا مىندا سۇيرەي بەرمە» دەپ ايتقان بولاتىن.

جانە دە شەتەلگە شىعاتىنداي دەنساۋلىعى دا كوتەرمەيدى، ۇشاققا مىنۋگە بولمايدى. پويىزبەن قازاقستاننىڭ ىشىندە عانا بولماسا، بالانىڭ جاعدايى كوتەرمەيدى. ازىرگە شەتەلگە بارۋدى ويلاپ جاتقان جوقپىز. مەن ءۇشىن ەڭ باستىسى - بالامنىڭ سىرت كەلبەتى ەمەس، ول مەن ءۇشىن ءارقاشان سۇيكىمدى. مەن ءۇشىن ەڭ كەرەگى يممۋنيتەتىن كوتەرىپ، جانىن قينايتىن اۋرۋلاردى ەمدەۋ. ال، ازىرگە پلاستيكالىق وپەراتسيا تۋرالى ويلامايمىن دا. بىرىنشىدەن، كىشكەنتاي، ەكىنشىدەن، مەن ءۇشىن ەڭ ماڭىزدىسى - دەنساۋلىعى. اقىل- ويى دامۋى كادىمگى بالا سياقتى، اياعىن ۋاقىتىندا باستى، ءتىلى ۋاقىتىندا شىقتى، تاماعىن ءوزى جەيدى. اقىلدى، قازاقشا دا، ورىسشا دا تازا سويلەيدى. اعىلشىن تىلىندە دە ءبىراز ءسوز جاتتاپ ءجۇر. ادامدارمەن تەز ارالاسىپ كەتەدى، ءبىراق ءجيى اۋىرا بەرگەن سوڭ ادامداردىڭ اراسىنا شىعارۋعا قورقامىن»، - دەيدى ەرناردىڭ اناسى.

اۆتور: كەنجەكەي توقتامۇرات قىزى