دارىگەرلەر ايەل دەنەسىندە ءبىر مەترلىك داكەنى ۇمىت قالدىرعان

استانا. قازاقپارات - رەسەيدەگى ۆورونەج قالاسىندا دارىگەرلەر ايەل قۇرساعىنان بىرنەشە جىل بۇرىن ۇمىت قالدىرىلعان ءبىر مەترلىك داكەنى الدى.

دارىگەرلەردىڭ پايىمداۋىنشا، بۇل زات بىرنەشە جىل بۇرىن جاسالعان وتا كەزىندە ۇمىت قالدىرىلعان، دەپ حابارلايدى «МОЕ! Online» اقپاراتتىق پورتالى. 2015 -جىلى ستارىي وسكول تۇرعىنى يۋليا حاۋستوۆا قالالىق № 2 -اۋرۋحاناعا تۇسكەن. وعان وتا جاسالعان، ءبىراق ايەلدىڭ جاعدايى جاقسارا قويماعان. ەكى جىل بويى توقتاۋسىز ەمدەلۋىن جالعاستىرادى. ءبىراق ەش ناتيجە شىقپايدى. 2016 -جىلى مامىردا گينەكولوگ وعان قايتا وپەراتسيا جاساۋدى بەلگىلەيدى. وتا كەزىندە ۇزىندىعى ءبىر مەترلىك داكە تابىلدى. دارىگەرلەردىڭ پىكىرىنشە، اعزادا وسىنداي ءىرى زاتپەن ەكى جىل بويى امان-ەسەن ءجۇرۋ تاڭقالارلىق وقيعا. يۋليا حاۋستوۆا جاقىن كۇندەرى سوتقا ارىزدانىپ، مورالدىق جانە ماتەريالدىق وتەماقى تالاپ ەتپەك.