پرەزيدەنت سايلاۋى كۇنى ىشىمدىك ىشكەندەرگە ايىپپۇل سالىنادى

استانا. قازاقپارات - جەكسەنبى كۇنى ەكۆادوردا باستالعان ەل پرەزيدەنتى مەن ۇلتتىق اسسامبلەيا دەپۋتاتتارىنىڭ سايلاۋى قالىپتى جاعدايدا ءوتىپ جاتىر، دەپ مالىمدەدى مەملەكەتتىڭ ۇلتتىق سايلاۋ كەڭەسىنەن.

«ريا نوۆوستي» اگەنتتىگىنىڭ حابارلاۋىنشا، سايلاۋدىڭ اشىلۋ سالتاناتىنا ەكۆادوردىڭ ءىس باسىنداعى پرەزيدەنتى رافاەل كوررەا قاتىستى. 18-65 جاس ارالىعىنداعى 12,8 ميلليون ەكۆادورلىق جاڭا پرەزيدەنتتى 8 ۇمىتكەر اراسىنان تاڭداۋى ءتيىس. ساراپشىلاردىڭ پايىمىنشا، ولاردىڭ اراسىندا جەڭىسكە ەڭ جاقىن تۇرعىندارى: لەنين مورەنو ("اليانس پايس" بلوگى)، ەكس- بانكير گيلەرمو لاسسو ("كرەو- سۋما" قوزعالىسى) جانە سوتسيال- حريستياندىق پارتيادان ۇسىنىلعان كانديدات سينتيا ۆيتەري. ەكۆادوردا سايلاۋ كۇنى سپيرتتىك ىشىمدىكتەردى ساتۋعا جانە ولاردى قولدانۋعا قاتاڭ تىيىم سالىنادى.

ەگەر سايلاۋعا قاتىسپاعاندىعى ءۇشىن 37,5 دوللار كولەمىندە ايىپپۇل قاراستىرىلعان بولسا، ىشىمدىككە قاتىستى زاڭدى بۇزعاندارعا 187 ا ق ش دوللارى سوماسىندا ايىپپۇل سالىنادى.