اقمولا وبلىسىنىڭ اكىمى قوياندىدا جەر تەلىمدەرىنىڭ زاڭسىز تاراتىلۋىنا جول بەرگەندەردى اتادى

كوكشەتاۋ. قازاقپارات - استانانىڭ ىرگەسىندەگى قوياندى اۋىلىندا جەر تەلىمدەرىنىڭ زاڭسىز تاراتىلۋىنا اۋىل اكىمى، ۋچاسكەلىك ينسپەكتورلار جول بەرگەن.

 بۇل تۋرالى بۇگىن «2016 -جىلدىڭ الەۋمەتتىك- ەكونوميكالىق دامۋىنىڭ قورىتىندىلارى جانە 2017 -جىلدىڭ نەگىزگى مىندەتتەرى» تۋرالى حالىق الدىندا ەسەپتىك كەزدەسۋىندە وبلىس اكىمى سەرگەي كۋلاگين مالىمەت ەتتى، دەپ حابارلايدى «قازاقپارات» ح ا ا ءتىلشىسى.

 ايماق باسشىسىنىڭ ايتۋىنشا، زاڭسىزدىققا جول بەرىپ، الاياقتىق جاساعانداردىڭ بارلىعى ءتيىستى جازاسىن الىپ وتىر.

«بۇل وتە كۇردەلى ماسەلە بولدى. اۋىل اكىمى، ۋچاسكەلىك ينسپەكتورلار جەر تەلىمدەرىنىڭ زاڭسىز تاراتىلۋىنا جول بەرگەن. ءبىراق، ءبىز حالىقتىڭ جاعدايىن ءتۇسىنىپ، 190 وتباسىنا سول جەر تەلىمدەرىن قالدىردىق. بەس وتباسىنىڭ ماسەلەسى ءالى شەشىلە قويىلعان جوق. بۇعان جول بەرگەن كىنالىلەر زاڭ الدىندا جاۋاپ بەردى»، - دەدى وبلىس اكىمى.

سونىمەن قاتار، ايماق باسشىسى استانانىڭ ىرگەسىندەگى ەلدىمەكەندەردى كەشەندى دامىتۋ جوسپارى اياسىندا 20 جوبانى جۇزەگە اسىرۋ ءۇشىن 5,7 ميلليارد تەڭگە بولىنگەنىن اتاپ ءوتتى. ونىڭ ىشىندە ماكسيموۆكا اۋىلىندا مەكتەپ قۇرىلىسى، جەتى ەلدىمەكەندە قۇرىلىس جانە جول ينفراقۇرىلىمىن كۇردەلى جوندەۋ، حالىقتى ساپالى اۋىز سۋمەن قامتاماسىز ەتۋ، سونداي- اق، سەلينوگراد، شورتاندى جانە ارشالى اۋداندارىنداعى سەگىز اۋىلدا ەلەكترمەن جابدىقتاۋ نىساندارىنىڭ قۇرىلىسى قاراستىرىلعان.

اۆتور: اسلان وسپانوۆ