سەناتورلار ۇلتتىق ۇلاندى دامىتۋ جوسپارىن تالقىلادى
08:38, 15 - اقپان 2017
استانا. قازاقپارات - 14- اقپاندا داريعا نازاربايەۆا باستاعان پارلامەنت سەناتى حالىقارالىق قاتىناستار، قورعانىس جانە قاۋىپسىزدىك كوميتەتىنىڭ مۇشەلەرى ۇلتتىق ۇلاننىڭ باسشىلىعىمەن كەزدەسىپ، «قازاقستان رەسپۋبليكاسى ۇلتتىق ۇلانىنىڭ 2017-2019-جىلدارعا ارنالعان دامۋ جوسپارىن» تالقىلادى.
د. نازاربايەۆا مەملەكەتتەگى قوعامدىق قاۋىپسىزدىكتى قامتاماسىز ەتۋدەگى ۇلتتىق ۇلاننىڭ ماڭىزدى ءرولىن اتاپ ءوتتى.
كەزدەسۋدە ۇلتتىق ۇلاننىڭ باس قولباسشىسى رۋسلان جاقسىلىقوۆ نەگىزگى باسىمدىقتاردى بەلگىلەپ، اسكەردىڭ ماتەريالدىق-تەحنيكالىق جابدىقتالۋى، قىزمەتكەرلەردىڭ تۇرعىن ۇيمەن قامتاماسىز ەتىلۋى ماسەلەلەرىن كوتەردى.
«دامۋ جوسپارىندا باسقارۋ ورگاندارىن ودان ءارى جەتىلدىرۋ، باسشىلىق جانە جاۋىنگەرلىك دايارلىق، اسكەري ءبىلىم بەرۋ جانە قارجى شىعىندارىنسىز جوسپارلى تۇردەگى مورالدىق-پسيحولوگيالىق تۇرعىدا قامتاماسىز ەتۋ شارالارى كوزدەلىپ وتىر»، - دەدى ر. جاقسىلىقوۆ.
سەناتورلار س. جاقسىبەكوۆ، م. التىنبايەۆ، ل. كينوۆ، گ. كيم كەزدەسۋدە وزەكتى ماسەلەلەرگە توقتالىپ، ءبىرقاتار ۇسىنىستارىن ورتاعا سالدى.
اۆتور: سەرىك قاراجان