ەلباسى «قىز جىبەك» وپەراسىنىڭ پرەمەراسىندا بولدى
10:25, 12 - اقپان 2017
استانا. قازاقپارات - ەلباسى نۇرسۇلتان نازاربايەۆ «قىز جىبەك» وپەراسىنىڭ پرەمەراسىندا بولدى، دەپ حابارلايدى اقوردانىڭ باسپا ءسوز قىزمەتى.
ۇلتتىق التىن قورداعى مۇرا - ە. برۋسيلوۆسكيدىڭ «قىز جىبەك» وپەراسى ۇلكەن زال ساحناسىندا قويىلدى.
وپەرانىڭ ليبرەتتوسىن جىبەك پەن تولەگەننىڭ تراگەديالىق ماحابباتى تۋرالى حالىقتىڭ وسى اتتاس ليرو-ەپوستىق پوەماسىنىڭ جەلىسىمەن كورنەكتى دراماتۋرگ ءارى جازۋشى عابيت مۇسىرەپوۆ جازعان.
الەۋمەتتىك جاعدايى ءارقيلى ەكى رۋ وكىلىنىڭ تراگەديالىق ماحابباتى ارقاۋ بولعان جىر جولدارىنان كوشپەلى قازاقتىڭ رۋحاني ءومىرى، ويى مەن ارمان-مۇڭى كورىنىس تابادى.