بەلگىلى باسىلىم پرەزيدەنتتىڭ سۋرەتىنىڭ ورنىنا ءارتىستىڭ سۋرەتىن باسىپ جىبەرگەن

استانا. قازاقپارات - دومينيكاندا جارىق كورەتىن El Nacional باسىلىمى ا ق ش پرەزيدەنتى دونالد ترامپتىڭ سۋرەتىنىڭ ورنىنا قاتەلەسىپ ءارتىس الەك بولدۋيننىڭ فوتوسىن سالىپ جىبەرگەن، دەپ جازادى BBC.

جۇما كۇنى بولدۋيننىڭ NBC تەلەارناسىندا شىعاتىن Saturday Night Live باعدارلاماسىنداعى ترامپتىڭ بەينەسىن سومداعان سكەتچتەن تۇسىرىلگەن سۋرەتى جاريالانىپ، استىنا «ا ق ش پرەزيدەنتى دونالد ترامپ» دەپ جازىلعان.

وسى وقيعادان سوڭ باسىلىم ءوز «تۆيتتەرىندە» قاتەلىك كەتكەنىن ايتىپ، وقىرمانداردان كەشىرىم سۇراعان. الايدا بۇل ساتتە وقيعا كوپشىلىككە كەڭ تاراپ، جۇرت الەۋمەتتىك جەلىدە جارىسا تالقىلاپ جاتقان ەدى.

Saturday Night Live تانىمال امەريكالىق تەلەشوۋلاردىڭ ءبىرى، 1975-جىلدان بەرى ەفيرگە شىعىپ كەلەدى.