مينيستر ابايەۆ «ادەبيەت پورتالىنىڭ» تانىستىرىلىمىندا ولەڭ وقىپ بەردى
شارا بارىسىندا اقپارات جانە كوممۋنيكاتسيالار ءمينيسترى داۋرەن ابايەۆ وزىنە ۇنايتىن ولەڭدى وقىپ بەردى، دەپ حابارلايدى قازاقپارات ءتىلشىسى.
اتالعان پورتالدىڭ جۇمىس ىستەپ جاتقانىنا ءۇش جىل بولدى. سايتتىڭ جاڭا نۇسقاسىنا بىرنەشە وزگەرىس ەنگىزىلدى. بىرىنشىدەن، پورتالدىڭ ۆيزۋالدىق كەلبەتى زامانعا ساي وزگەرتىلىپ، وقىرمان ءۇشىن جەڭىل ءارى ىڭعايلى قىزمەتتەر ەنگىزىلىپ وتىر. ەكىنشىدەن، كەز كەلگەن قولدانۋشى جەكە بلوگىن اشىپ، ادەبيەت تاقىرىبىندا ەركىن پىكىر الماسا الادى. ۇشىنشىدەن، سايتتىڭ موبيلدى نۇسقاسى ىسكە قوسىلدى. بۇگىنگى شارا بارىسىندا مىرزاتاي جولداسبەكوۆ، تولەن ابدىك سىندى ەلىمىزگە بەلگىلى قوعام قايراتكەرلەرى مەن جازۋشىلار ءوز تىلەكتەرىن ءبىلدىرىپ، اربىرەۋى ءبىر-ءبىر ولەڭ شۋماعىن جولدادى. اقپارات جانە كوممۋنيكاتسيلار ءمينيسترى داۋرەن ابايەۆ تا ولاردان قالىسپاي، قادىر مىرزا-ءالىنىڭ ءبىر ولەڭىن وقىپ بەردى.
«ەكى-ءۇش كۇن بۇرىن القا ماجىلىسىندە مىرزاتاي اعامىز «كىندىگىمدى كەسكەن جۇرت» دەگەن كەرەمەت ءبىر كىتاپتى سىيلاپ ەدى. سونى قاراپ شىعىپ، ءبىر ولەڭ قاتتى ۇنادى. سول ولەڭدى وقىپ بەرەيىن. اۆتورى - قادىر مىرزا- ءالى اعامىز:
«قابات-قابات بۇلت تونسە دە باسىڭا،
قاباعىڭدى شىتپا، جىگىت، جاسىما!
ءبىز شەگىنسەك، ءبىز جەڭىلسەك، بىزدەردى،
بايقاپ تۇرىپ نە ىستەمەكشى جاس ۇلان؟!
وت ىشىندە، ءورت ىشىندە كۇيگەندە،
باسىڭدى يمە، تىزە بۇكپە، يمەنبە!
ەر ەڭكەيسە ەڭكەيەدى جالعىز-اق
تۋعان جەردىڭ توپىراعىن سۇيگەندە!».
ادەبيەت پورتالىنىڭ جاڭا نۇسقاسى قۇتتى بولسىن! وسى جاڭا قادام ەلگە ادەبيەتتى جاڭاشا ناسيحاتتاۋعا ءوز ۇلەسىن قوسادى دەپ سەنەمىن»، - دەدى ابايەۆ.
ايتا كەتەيىك، «ادەبيەت پورتالى» اقپارات جانە كوممۋنيكاتسيالار مينيسترلىگىنە قاراستى «قازكونتەنت» ا ق قۇرامىنا كىرەدى. قازىرگى كەزدە پورتالدا 4 مىڭنان استام كىتاپ بار. سونداي-اق ءۇش مىڭنان استام اۆتوردىڭ جەكە پاراقشاسى اشىلعان.
اۆتور: ارمان اسقاروۆ