قانات يسلامنىڭ كەلەسى قارسىلاسى جايلى نە بىلەمىز؟
بۇگىن قارسىلاسى جايلى از-كەم اقپارات بەرە كەتكەندى ءجون ساناپ وتىرمىز.
روبسون سوارەش دە اسسيس 1978-جىلى دۇنيەگە كەلگەن. كاسىپقوي بوكستاعى مانسابىن 2006-جىلى باستاعان. العاشقى جەكپە-جەگىندە ەۋرەليۋس حوسە دە ماۋرا ەسىمدى بوكسشىنى ۇپاي ايىرماسىمەن ۇتقان. ودان كەيىن 6 جىلداي ۋاقىت كاسىپقوي شارشى الاڭدا جەكپە-جەك وتكىزبەگەن. 2012-جىلى بوكسقا قايتا ورالىپ، جەڭىستى جولىن جالعاعان.
برازيليالىق بوكسشى 2 جىل ىشىندە 13 جەكپە-جەك وتكىزىپ، بارلىعىندا جەڭىسكە جەتەدى. ارگەنتينالىق حەكتور كارلوس سانتاناعا قارسى جەكپە-جەكتە جەڭىسكە جەتىپ، مانسابىنداعى العاشقى چەمپيوندىق بەلبەۋىن جەڭىپ الادى. ول - جارتىلاي ورتا سالماقتاعى «interim WBO Latino» بەلبەۋى ەدى.
روبسون سوارەش دە اسسيس بارلىق جەكپە-جەگىن ءوز ەلىندە وتكىزىپ كەلدى. 2014-جىلى بوكسشى «WBO Oriental» جانە «PABA» چەمپيوندىق اتاقتارى ءۇشىن اۋسترالياعا جول تارتتى. وندا ول ەندى عانا تانىلىپ كەلە جاتقان دجەفف حورنمەن جۇدىرىقتاسۋعا كەلىسكەن ەدى. الايدا برازيليالىق بوكسشىنىڭ وزگە ەلدەگى العاشقى جەكپە-جەگى ءساتسىز اياقتالدى. ءتورتىنشى راۋندتا ەكى رەت تىزەرلەپ تۇردى. ال بەسىنشى راۋندتا نوكاۋت الىپ، جەكپە-جەكتى جالعاستىرا المادى. دجەفف حورن بولسا جىلدان-جىلعا تانىلىپ، جەڭىلىسسىز كەلەدى. ءساۋىر ايىندا ول ايگىلى مەنني پاكياومەن جۇدىرىقتاسادى.
برازيليالىق بوكسشى اۆسترالياداعى جەڭىلىسىنەن كەيىن كاسىپقوي بوكستى تاستاپ كەتكەن جوق. اراعا ءبىر اي سالا وتانداسى فلاۆيو پاردينومەن جۇدىرىقتاستى. قارسىلاسىن ۇتىپ شىقتى.
2015-جىلى روبسون سوارەش دە اسسيسكە كەزەكتى رەت چەمپيوندىق اتاققا تالاسۋعا مۇمكىندىك تۋدى. برازيليالىق بوكسشى وسى جەكپە-جەكتە جەڭىسكە جەتۋگە تالپىندى. الايدا كانادانىڭ تورونتو قالاسىندا وتكەن جەكپە-جەكتە ۋاقىتشا «WBA-NABA» چەمپيوندىق اتاعىن يەلەنە المادى. كولۋمبيالىق بوكسشى سامۋەل ۆارگاستان 6-راۋندتا تەحنيكالىق نوكاۋتپەن ۇتىلدى.
روبسون اسسيس ءوز سالماعىندا برازيليانىڭ ۇزدىك بوكشىسى. ولاي دەيتىنىمىز ءوز سالماعىنداعى برازيليالىق بوكسشىلاردىڭ كوپشىلىگىن ايقىن جەڭگەن. سامۋەل ۆارگاستان ۇتىلعاننان كەيىن وتانداسى حوەل پەررەيرا دە سيلۆامەن كەزدەستى. قارسىلاسىن ءبىرىنشى راۋندتا-اق نوكاۋتپەن ۇتتى.
برازيليالىق بوكسشى سوڭعى جەكپە-جەگىن كانادالىق ستيۆەن باتلەرگە قارسى وتكىزىپ، 21 جاستاعى قارسىلاسىنان ۇتىلىپ قالدى. كۆەبەكتە (كانادا) وتكەن بوكس كەشىندە روبسون اسسيس «IBF» تۇجىرىمى بويىنشا جاستار اراسىنداعى الەم چەمپيونىنا قارسىلىق تانىتا المادى.
ءوز ەلىندە وتكىزگەن بارلىق جەكپە-جەكتەرىندە جەڭىسكە جەتسە، وزگە ەلدە روبسون اسسيستىڭ جولى بولماعان. قارسىلاستارى دا قاۋقارلى ەدى. بۇگىندە ونى جەڭگەن بوكسشىلار كاسىپقوي بوكستا تانىلىپ ۇلگەردى. ءبىر سوزبەن ايتقاندا، قاناتتىڭ قارسىلاسى وسال ەمەس ، ءتىس قاققان بوكسشىلاردىڭ ءبىرى.
قازاقستاندىق جانكۇيەرلەر قانات يسلامنىڭ كەلەسى قارسىلاسىن اسىعا كۇتتى. ءتىپتى كەي باسىلىمدار وتانداسىمىزدى ايگىلى مەكسيكالىق ساۋل «كانەلو» الۆارەسپەن كەزدەسىپ قالۋى مۇمكىن ەكەنىن دە جازدى. دەگەنمەن قاناتقا قارسىلاس برازيليادان تابىلدى. قوس بوكسشى اراسىنداعى جەكپە-جەك روي دجونس (كىشىسى) پەن بوببي گان اراسىنداعى كەزدەسۋدىڭ اندەركارتىندا وتەدى. بۇل دا بوكسشىلاردىڭ ىنتا-جىگەرىن ارتتىرارى ءسوزسىز.
38 جاستاعى برازيليالىق بوكسشى دا سپورتتىق مانسابىنىڭ سوڭىندا كوپ جەڭىلگەندى ماقسات تۇتپايتىنى انىق. ال قانات يسلام ءۇشىن ءار جەكپە-جەكتىڭ ماڭىزى جوعارى. وتانداسىمىز ءۇشىن ءىرى چەمپيوندىق اتاقتارعا تالاس وتكىزەتىن جەكپە-جەكتەرى الدا دەپ بىلەمىز.
قانات يسلام بۇل جەكپە-جەكتە چەمپيوندىق اتاعىن قورعامايدى. بۇل تۋرالى ««Nelsons Promotion پروموۋتەرلىك كومپانياسىنىڭ قازاقستانداعى وكىلى نۇرعازى ىسماعامبەتوۆ ايتقان ەدى.
«قانات يسلام كاسىپقوي بوكستاعى كەلەسى كەزدەسۋىن 17-اقپان كۇنى نيۋ-دجەرسي شتاتىنداعى نيۋاركا قالاسىندا وتەدى. روي دجونستىڭ قاتىسۋىمەن وتەتىن بوكس كەشىندە يسلام 10 راۋندتىق جەكپە-جەك وتكىزەدى. ءبىراق، بۇل كەشتە قانات چەمپيوندىق اتاعىن قورعامايدى. وتانداسىمىز چەمپيوندىق اتاعىن تەك قازاقستاندا قورعايمىن دەپ وتىر. قارسىلاسىنىڭ كىم بولاتىنىن الداعى ۋاقىتتا حابارلايمىز. قانات يسلام قازىر ا ق ش- تا. نەلسون لوپەزدىڭ قول استىندا جاتتىعۋ جۇمىستارىنا كىرىسىپ كەتتى»، - دەگەن ەدى.
ايتا كەتەيىك، قانات يسلام كاسىپقوي بوكستاعى ءوزىنىڭ سوڭعى جەكپە-جەگىن 2016-جىلدىڭ 29- قازان كۇنى الماتىدا وتكىزىپ، تورەشىلەردىڭ شەشىمى بويىنشا گانالىق بوكسشى پاتريك اللوتەيدەن باسىم تۇسكەن ەدى.
vesti.kz