ۋنيۆەرسيادا كەزىندە ءبىرقاتار اتلەتتەردىڭ دەنساۋلىعىنان اقاۋ تابىلعان

الماتى. قازاقپارات - ۋنيۆەرسيادا كەزىندە دەنساۋلىعىنان اقاۋ تابىلعان اتلەتتەر بولدى.

بۇل تۋرالى قازاقپارات ءتىلشىسىنىڭ ارنايى ساۋالىنا جاۋاپ بەرگەن 28- بۇكىلالەمدىك قىسقى ۋنيۆەرسيادانىڭ رەسمي سەرىكتەسى بولىپ، مەديتسينالىق-زەرتحانالىق قىزمەت ۇسىنعان «ىNVITRO»  كومپانياسىنىڭ ستراتەگيالىق دامۋ ديرەكتورى، دەنساۋلىق ساقتاۋ ماگيسترى رايحان مامىروۆا ءمالىم ەتتى.

«ۋنيۆەرسيادا كەزىندە دەنساۋلىعىنان اقاۋ تابىلعان اتلەتتەر بولدى. ناقتىراق ايتقاندا، وكپە قابىنۋى جانە برونحيت سەكىلدى جەدەل ينفەكسيالى اۋرۋمەن اۋىرعان اتلەتتەر بولدى جانە سپورتشىلارعا ءتان كورسەتكىشتەردىڭ وزگەرۋىن دە بايقادىق»، - دەدى رايحان مامىروۆا.

ول سونداي-اق ءبىرقاتار ەلدىڭ سپورتشىلارىنىڭ دەنساۋلىعى ايتارلىقتاي جاقسى ەكەنىن بايقاعانىن ايتتى.

«ۋكراينا، بەلارۋس، رەسەي مەن قىتاي،  ۇلى بريتانيا، نيدەرلاندى، يتاليا، پولشا ەلدەرىنەن كەلگەن سپورتشىلاردىڭ دەنساۋلىعى مىقتى ەكەنىن بايقادىق. ۋكراينالىق دەلەگاتسيانىڭ ەكى وكىلى ءبىزدىڭ مەديتسينالىق كەڭسەدە قان تاپسىرىپ، ءبىزدىڭ قىزمەتكەردەردىڭ قىزمەتىنە ءتانتى بولعانى سونشالىق، قان ناتيجەسىن الۋعا كەلگەندە ارنايى قولدان جاسالعان ساندىقشا جانە قولمەن بەزەندىرىلگەن ۋكراينا جالاۋىن سىيعا تارتتى»، - دەدى رايحان مامىروۆا.

ايتا كەتەيىك، «ىNVITRO»  كومپانياسى 28- بۇكىلالەمدىك قىسقى ۋنيۆەرسيادانىڭ رەسمي سەرىكتەسى بولىپ، بارلىق سپورتتىق شارالار كەزىندە سپورتشىلاردى مەديتسينالىق تەكسەرۋ بويىنشا زەرتحانالىق قىزمەت ۇسىندى. زەرتحانالىق قىزمەت اتلەتتەر قالاشىعىندا جۇزەگە اسىرىلدى. سپورتشىلار ءۇشىن كومپانيا 13 زەرتحانالىق تەكسەرۋ قىزمەتى جۇرگىزىلدى. ونىڭ ىشىندە، جالپى قان اناليزى، الت، است، جالپى بيليرۋبين، تۋرا بيليرۋبين، جالپى اقۋىز، گليۋكوزا، كرەاتينين، ميكروەلەمەنتتەر: كالي، ناتريي، يوندالعان كالتسي، تەستوستەرون، كورتيزول، كرەاتينفوسفوكينازا سىندى اناليزدەر الىندى.

اۆتور: الماس مۇقاش ۇلى