قازاقستان قىتايعا مول كولەمدە بال تاسىمالدايدى
بۇل تۋرالى بۇگىن استانادا وتكەن باسپا ءسوز ءماسليحاتىندا ق ر اۋىل شارۋاشىلىعى ءبىرىنشى ۆيتسە-ءمينيسترى قايرات ايتۋعانوۆ ءمالىم ەتتى، دەپ حابارلايدى قازاقپارات.
«بۇگىندە وندىرۋشىلەر قىتايعا ءبىرقاتار ءونىمدى ەكسپورتتاۋ ءۇشىن وزدەرىنىڭ ۇسىنىستارىن جاساۋدا. وسى رەتتە ەتتى اۋقىمدى كولەمدە تاسىمالداۋ ماسەلەسى نازاردا تۇر. سونىمەن قاتار بال ەكسپورتى بويىنشا دا وتە كوپ ۇسىنىس جاسالدى. اتاپ ايتقاندا، قازاقستاندىق بال قىتايدا جوعارى باعالانادى. بۇگىندە ءتيىستى جۇمىستار اتقارىلىپ جاتىر جانە مامىر ايىندا اتالعان ەلگە قازاقستاندىق بالدى ەكسپورتتاۋ بويىنشا كەلىسىمگە قول قويىلادى دەپ كۇتىلۋدە»، - دەدى ايتۋعانوۆ.
مۇنىمەن قوسا ول قىتايعا بيداي تاسىمالداۋ ماسەلەسىنە توقتالدى. «جىل سايىن بىزدەن جەتكىزىلەتىن بيداي كولەمى ارتىپ كەلەدى. بۇگىندە ق ح ر ترانزيتتىك دالىزىمەن بيدايىمىز ۆەتنامعا جەتكىزىلۋدە. ال ەت ەكسپورتى تۇرعىسىندا اۋسىل مەن قازاقستاندىق كاسىپورىنداردىڭ سەرتيفيكاتتاۋىنىڭ بولماۋىنا قاتىستى قىتاي تاراپىنان شەكتەۋ بار. قىتاي ەكسپورتتاۋشىلارعا ءوزىنىڭ تالاپتارىن قويىپ وتىر»، - دەدى ءبىرىنشى ۆيتسە-مينيستر.
ونىڭ سوزىنە قاراعاندا، جاقىن ارادا اۋسىل ىندەتى بويىنشا شەكتەۋ الىنىپ تاستالادى دەپ كۇتىلۋدە.
اۆتور: رۋسلان عابباسوۆ