ۋنيۆەرسيادا قازاق ەلىندە قىسقى سپورتتىڭ قارقىندى دامىپ كەلە جاتقانىن كورسەتتى
ولاي دەيتىنىمىز، ۋنيۆەرسيادا ويىندارى قازاق سپورتشىلارى ءۇشىن ءساتتى باستالىپ، تابىستى اياقتادى. ءتىپتى، جەرلەستەرىمىز قاتارىندا ءبىر ءوزى بىرنەشە مەدالعا قول جەتكىزگەن سپورتشىلاردى دا كەزدەستىردىك.
ايتالىق، اننا شيەۆچەنكو ءبىر ءوزى الماتى تورىندە 5 مەدالعا قول جەتكىزدى. ونىڭ بىرەۋى التىن، بىرەۋى كۇمىس، ۇشەۋى قولا جۇلدە. ال فريستايلدىڭ موگۋل تۇرىنەن دميتري رەيحارد پەن يۋليا گالىشيەۆا قوس-قوس التىنعا قول جەتكىزدى. التىن العان سپورتشىلارىمىزدىڭ قاتارىندا قاراكوزدەرىمىز دە جوق ەمەس. فريستايلدىڭ اكروباتيكا تۇرىنەن سىنعا تۇسكەن جانبوتا الدابەرگەنوۆا مەن جىبەك اراپبايەۆانىڭ جەتىستىگىنە سۇيىنبەگەن ەل قالمادى.
اراپبايەۆا ءبىر كۇمىستى قانجىعاسىنا بايلاسا، الدابەرگەنوۆا ءبىر قولا، ءبىر التىنعا قول جەتكىزدى. مىنە، وسىلايشا جەرلەستەرىمىز 11 التىن 8 كۇمىس 17 قولا مەدالمەن قىسقى ۋنيۆەرسيادا ويىندارىنداعى رەكوردتىق ناتيجەلەرىنە قول جەتكىزدى.
بۇعان دەيىن اتالمىش دوداعا 8 رەت قاتىسىپ، ەڭ جوعارعى كورسەتكىشكە 2015-جىلى وتكەن باسەكەدە قول جەتكىزگەن بولاتىنبىز. وندا 5 التىن، 6 كۇمىس مەدالمەن جالپى كوماندالىق ەسەپتە 3-ورىندى جەڭىپ العان بولاتىنبىز.
ال ەڭ تومەنگى كورسەتكىشىمىزدى 2011-جىلى تۇركيانىڭ ەرزۋرۋم قالاسىندا وتكەن ۋنيۆەرسيادا ويىندارىندا تىركەدىك. بۇل سىندا 1 التىن، 5 قولا مەدالمەن جالپى كوماندالىق ەسەپتە 18-ورىنعا تۇراقتادىق. مىنە، بيىل قازاقستان قۇراماسى بارلىق مەدالدار جاعىنان جاڭا رەكوردتىق كورسەتكىشكە قول جەتكىزىپ وتىر.
بۇل قازاق ەلىندە كەنجەلەپ قالعان قىسقى سپورت تۇرلەرىنىڭ دامىپ كەلە جاتقاندىعىنىڭ ايقىن دالەلى. ەندى قازاقستان وسىعان دەيىن قانشا ۋنيۆەرسياداعا قاتىسىپ، جالپى ەسەپتە نەشىنشى ورىنعا قول جەتكىزگەنىن نازارلارىڭىزعا ۇسىنامىز.
قازاقستاننىڭ قىسقى ۋنيۆەرسياداداعى ناتيجەلەرى:
1. 1993-جىل. زاكوپانە (پولشا) - 1 كۇمىس. جالپى كوماندالىق ەسەپتە - 16-ورىن
2. 1995-جىل. حاكا (يسپانيا) - 2 التىن، 1 قولا. جالپى كوماندالىق ەسەپتە - 8-ورىن
3. 2003-جىل. تارۆيزيو (يتاليا) - 2 التىن، 2 كۇمىس، 2 قولا. جالپى كوماندالىق ەسەپتە - 10-11-ورىن
4. 2005-جىل. ينسبرۋك (اۆستريا) - 4 التىن، 1 كۇمىس، 2 قولا. جالپى كوماندالىق ەسەپتە - 7-ورىن
5. 2007-جىل. تۋرين (يتاليا) - 2 التىن، 1 كۇمىس، 2 قولا. جالپى كوماندالىق ەسەپتە - 13-ورىن
6. 2011-جىل. ەرزۋرۋم (تۇركيا) - 1 التىن، 5 قولا. جالپى كوماندالىق ەسەپتە - 18-ورىن
7. 2013-جىل. ترەنتينو (يتاليا) - 2 التىن، 2 كۇمىس، 1 قولا. جالپى كوماندالىق ەسەپتە - 15-ورىن
8. 2015-جىل. گرانادا (يسپانيا)، شتربسكە- پلەسو (سلوۆاكيا) - 5 التىن، 6 كۇمىس. جالپى كوماندالىق ەسەپتە - 3-ورىن.
9. 2017-جىل. الماتى (قازاقستان) - 11 التىن، 8 كۇمىس 17 قولا. جالپى كوماندالىق ەسەپتە - 2-ورىن.
اۆتور: كۇنسۇلتان وتارباي