جەتى ساعات جيىرما ءبىر مينۋتقا سوزىلعان باسپا ءسوز ءماسليحاتىندا رەسەي مەن ونىڭ پرەزيدەنتى ۆلاديمير پۋتينگە باۋىرلاس ەلدىڭ باسشىسى تاراپىنان كوپ وكپە ايتىلدى.
ليبەرالدار كلۋبىنىڭ زەرتتەۋلەر جونىندەگى ديرەكتورى ەۆگەني پرەيگەرمان BBC- گە بەرگەن تۇسىنىكتەمەسىندە بىلاي دەيدى: «مىنا جاعداي بۇرىنعىلارعا قاراعاندا الدەقايدا كۇردەلى ءھام جاعىمسىز. بۇرىنعىلارى دا وڭاي بولماعان، ءبىراق مىنانىڭ سالدارى اۋىر بولۋى مۇمكىن. ەكى تاراپ تا بىرىنە-ءبىرى دەس بەرەر ەمەس. ءوز قۇنىن كوتەرۋ - كەز كەلگەن ديپلوماتياعا ءتان قۇبىلىس. لۋكاشەنكو ءاردايىم كەسىپ-ءپىشىپ ايتقاندى، ماسەلەنىڭ «قىسىمىن كوتەرىپ» جەتكىزگەندى ءجون كورەدى. كرەمل دە قاراپ قالعان جوق، «كىمدى-كىم اسىراپ وتىرعانىن» ەسكە سالدى. كوردىڭىز بە، داۋ جاريا تۇرگە ۇلاستى.
ازىرگە اناۋ ايتقانداي قاۋىپ كورىپ تۇرعانىم جوق. رەسەي مەن بەلارۋستەگى كەيبىر قياليلار ەكى ەلگە سوعىس بۇلتىن ءتوندىرىپ قويدى. ەگەر جاعداي سوعان قاراي ويىسسا، بۇدان ەكى تاراپ تا وڭباي ۇتىلادى»، - دەيدى ەۆگەني پرەيگەرمان.
بەلارۋستىڭ ليبەرالدى-دەموكراتيالىق پارتياسىنىڭ وكىلى ولەگ گايدۋكيەۆيچ «شىندىق لۋكاشەنكونىڭ جاعىندا» دەپ ەسەپتەيدى. «تەكەتىرەس قاقتىعىسقا ۇلاسپايدى. نەگە؟ ويتكەنى لۋكاشەنكو شىندىقتى ايتىپ وتىر. ول ءبىزدىڭ رەسەيمەن اراداعى بايلانىستا ەشقانداي باقاي ەسەپكە بارمايتىنىمىزدى ەسكەرتتى. ءبىز بارلىق مىندەتتەمەلەردى ورىنداپ ءجۇرمىز. رەسەي پرەزيدەنتى مۇنى دۇرىس ءتۇسىنۋى كەرەك»، - دەيدى گايدۋكيەۆيچ.
«لۋكاشەنكونىڭ ايتقانىنا پۋتيننىڭ كونە قويۋى ەكىتالاي. ول دا «شىندىق مەن جاقتا» دەپ ەسەپتەيدى. ەگەر رەسەي پرەزيدەنتى بەلارۋس باسشىسىن تىزەگە سالىپ جۇباتسام دەپ شەشسە نە بولماق؟ وندا باۋىرلاس ەكى ەلدىڭ اراسىن جالعاپ تۇرعان كوپىردى ءورت شالۋى مۇمكىن»، - دەپ جازادى باسىلىم.