تۇركىستاندىقتار ليمون وسىرە باستادى

استانا. قازاقپارات - تۇركىستان قالاسىنا قاراستى ياسسى اۋىلدىق وكرۋگىندەگى «قانجىگىت» شارۋا قوجالىعىنىڭ جىلىجايىندا ليمون ءوسىپ تۇر، دەپ حابارلايدى قالالىق اكىمدىكتىڭ باسپا ءسوز قىزمەتى.

2015 -جىلدىڭ جەلتوقسان ايىندا ەگىلگەن تسيترۋستى كوشەتتەر وسى جىلدىڭ كۇزىندە ءونىم بەرەدى ەكەن. وسىنداي جاڭالىقپەن بولىسكەن «قانجىگىت» ش ق اگرونومى ب. مومىنوۆ: «ليمون 40-60 جىل ءومىر سۇرەتىن وسىمدىك. العاشقى جەمىسىن 2 نەمەسە 3 جىلدا بەرەدى. ويتكەنى بۇل باياۋ وسەدى. سوندىقتان ليمون وسىرۋدە اسقان شىدامدىلىق قاجەت. كەيدە وسىنداي كۇتىممەن بانان، كيۆي سياقتى تروپيكالىق جەمىستەردى دە جۇرەكسىنبەي جىلىجايلاردا وسىرۋگە بولاتىن سياقتى»، - دەپ جاڭاشىل ويلارىن جەتكىزدى.

 

 ب. مومىنوۆ ليمون كوشەتتەرىنە كۇتىم جاساۋدى جاقسى مەڭگەرگەن. ارنايى كۋرستان ءدارىس العان اگرونوم 3 گەكتار جەرگە ەگىلگەن ليمون اعاشىنان الداعى ۋاقىتتا مول ءونىم الۋدى جوسپارلاپ وتىرعانىن ايتادى.

 

 ايتا كەتەرلىگى، «قانجىگىت» ش ق جىلىجاي كاسىبىن باستاعانىنا بەس جىلدان اسقان. 3 گەكتار جەرگە قىزاناق پەن قيار ەگىپ وتىرعان شارۋا قوجالىق وكىلىنىڭ ايتۋىنشا جىلىجاي اۋماعىن كەڭەيتىپ، ءونىم تۇرلەرىن كوبەيتپەك نيەتتە. بۇگىندە مۇندا 30 عا جۋىق اۋىل تۇرعىندارى جۇمىسپەن قامتىلىپ وتىر.