ديماشتىڭ دجەكي چانعا جاپقان شاپانىن شىنجاڭداعى قانداستارىمىز تۇندەلەتىپ بەيجىڭگە جەتكىزىپ بەرگەن - فوتو
اتى الەمگە ءماشھۇر اكتەردىڭ جاس ءانشى ديماش قۇدايبەرگەنوۆپەن كەزدەسۋى - كەشەگى ءبىر كۇننىڭ عانا ەمەس، بيىلعى ءبىر جىلدىڭ ەڭ ۇزدىك جۇلدىزدى كەزدەسۋى دەپ ايتۋعا ابدەن بولادى. سۋپەر جۇلدىز بۇل جولى قازاقتىڭ كوك شاپانىن كيىپ، قاسيەتتى دومبىراسىن قولىنا ۇستاپ قايتتى.
قىتايدىڭ ۆيچات الەۋمەتتىك جەلىسىنە تاراعان اقپاراتقا سايكەس، اتاقتى اكتەرگە سىيلاعان دومبىرا مەن قازاقى شاپاندى شىنجاڭداعى «حالىقارالىق كەرۋەن» سەرىكتەستىگىنىڭ وكىلى ەسبول مۇحامادان ۇلىنىڭ تاپسىرىسى بويىنشا، ۋاليبەك تۇرداقىن ۇلى تۇندەلەتىپ شىنجاڭداعى ۇلتتىق بۇيىمدار دۇكەندەرىن ارالاپ، ەڭ ساپالى قازاقى شاپان مەن ناعىز شەبەردىڭ قولىنان شىققان قازاقتىڭ قارا دومبىراسىن تاۋىپ، كۇندىزگى ساعات 11-دە بەيجىڭگە جەتكىزىپ بەرگەن.
«مەن ءۇشىن ءتۇن ىشىندە دومبىرا مەن شاپاندى تابۋ وڭاي بولعان جوق. الەۋمەتتىك جەلىلەر كومەگىمەن جەدەل ىزدەستىرۋ ارقىلى «اينا» ساز ورتالىعىنان دومبىرانى، «جاسبۇلاق» كيىم- كەشەك دۇكەنىنەن شاپاندى تاڭداپ الدىردىم. ءسويتىپ، شۇعىل تۇردە ءۇرىمشى ۋاقىتى بويىنشا تاڭعى ساعات التىلاردا ۇشاقپەن جولعا شىعىپ، تۇسكە جاقىن بەيجىڭ قالاسىندا ديماش قۇدايبەرگەنوۆكە ءوز قولىممەن تابىس ەتتىم» ، - دەيدى «مانسۇرسوفت» سەرىكتەستىگىنىڭ قۇرىلتايشىسى ۋاليبەك تۇرداقىن ۇلى.
اۆتور: بەيسەن سۇلتان ۇلى