ەلوردادا ۇلى دالا فورۋمى وتەدى
بۇل تۋرالى «جويىلۋ قاۋپىندەگى تۇركى تىلدەرى» اتتى كوپ تومدىق ەڭبەكتىڭ تانىستىرىلىمدا تۇركى اكادەمياسىنىڭ پرەزيدەنتى، «ەگەمەن قازاقستان» رەسپبۋليكالىق گازەتىنىڭ باسقارما ءتوراعاسى دارحان قىدىرالى ءمالىم ەتتى. «ءبىز وتكەن جىلدىڭ مامىر ايىندا «ۇلى دالا» دەپ اتالاتىن ءبىرىنشى گۋمانيتارلىق فورۋم وتكىزگەن ەدىك. وعان رەسەيلىك، تۇركيالىق، جالپى تۇركى عالىمدارى قاتىستى جانە ولار ساياسي جۇيەگە قاراماستان وسى ىنتىماقتاستىقتى دامىتۋ جونىندە كوپتەگەن ويلارىن ايتتى. بيىل ەكىنشى «ۇلى دالا» فورۋمى 26- مامىردا وتەدى جانە تاقىرىبىنىڭ ءبىرى جويىلىپ بارا جاتقان ءتۇرلى حالىقتارعا ارنالادى. ءبىزدىڭ بيىلعى فورۋمنىڭ تاعى ءبىر ۇلكەن بولىگى پروفەسسور، كورنەكتى مەملەكەت جانە قوعام قايراتكەرى، قازاقستانداعى تۇركولوگيانىڭ باستاۋىندا تۇرعان مىرزاتاي جولداسبەكوۆكە ارنالماق»، - دەدى قىدىرالى.
ايتا كەتەيىك، بۇگىن تانىستىرىلىمى وتكەن «جويىلۋ قاۋپىندەگى تۇركى تىلدەرى» ەڭبەگى تۇركى اكادەمياسى مەن قوجا احمەت ياسساۋي اتىنداعى قازاق-تۇرىك ۋنيۆەرسيتەتىنىڭ قولداۋىمەن جارىق كورىپ وتىر. ەڭبەككە تۇركيالىق عالىم سۋەر ەكەر عىلىمي جەتەكشىلىك جاساعان. عىلىمي ەڭبەكتى ازىرلەۋ جۇمىستارىنا الەمنىڭ 26 ەلىنەن 130 عالىم قاتىسقان جانە وندا 132 زەرتتەۋ توپتاستىرىلعان.
كىتاپتى شىعارۋشىلاردىڭ ايتۋىنشا، جيناققا ەنگەن ەڭبەكتەردىڭ اۆتورلارى الەمنىڭ ءتۇرلى ەلدەرىنىڭ ۋنيۆەرسيتەتتەرى مەن عىلىمي ۇجىمدارىندا جۇمىس ىستەيدى. سول سەبەپتى دە باسىلىمداعى دەرەكتەر مەن زەرتتەۋ تاسىلدەرى، عىلىمي باعىتتار، كوزقاراستار ءارالۋان.
اۆتور: مارلان جيەمباي