ۇلتتىق ۇلان ساربازدارى ورتەنگەن ۇيدەن ارباعا تاڭىلعان ادامدى الىپ شىقتى
توتەنشە جاعداي 3 - اقپان كۇنى بولدى، ءبىراق بۇل ەرلىك تۋرالى جەڭىس كوشەسىندەگى كوپقاباتتى ءۇيدىڭ 75 تۇرعىنىنان كومانديرگە العىس حات كەلگەندە عانا بەلگىلى بولدى.
ۇلتتىق ۇلان باسپا ءسوز قىزمەتىنىڭ حابارلاۋىنشا، 3 - اقپان كۇنى شامامەن 21:15-تە قوعامدىق ءتارتىپتى قاداعالايتىن اسكەري جاساق باسشىسى، قاتارداعى جاۋىنگەر نۇرتاس تورەقۇل كومەك سۇراعان داۋىس ەستىگەن. اۋلاعا كەلگەن اسكەريلەر جينالعان قاۋىم مەن قويۋ ءتۇتىندى كورگەن.
وقيعا تۋرالى ولار اسكەري جاساق بويىنشا كەزەكشى لەيتەنانت ەرجان ماراتوۆقا حابارلادى، ول 101 تەلەفونىنا ءورت تۋرالى حابار بەردى.
اسكەريلەر نۇرتاس تورەقۇل، دارحان ءالعازى جانە بەكزات قابيەۆ جوعارعى قاباتتارعا كوتەرىلۋ تۋرالى شەشىم قابىلدايدى. قويۋ ءتۇتىن مەن قولقانى قاباتىن يىسكە قاراماستان ولار 7 ادامدى، ونىڭ ىشىندە ءۇش بالانى اجالدان اراشالاپ قالدى.
جوعارىدا اتالعان اربازدار تۇرعىنداردى ەۆاكۋاتسيالاپ جاتقاندا، قاتارداعى جاۋىنگەرلەر ەربول سماعۇلوۆ، دانيل كرەمەر جانە جاسۇلان شالتابايەۆ ءۇي اۋماعىن قورشادى. تۇرعىنداردىڭ ءبىرى 412-بولمەدە مۇگەدەك ادامنىڭ تۇراتىنىن ايتقاندا، اسكەريلەر بولمەنى تەكسەرمەككە بەل بۋدى. شىن مانىندە، مۇمكىندىگى شەكتەۋلى جان بولمەسىنەن تابىلدى. ارباعا تاڭىلعاندىقتان، وزدىگىنەن شىعا الماعان. ەكى اسكەري قىزمەتشى ونى قاۋىپسىز جەرگە شىعاردى.
ت ج قىزمەتكەرلەرى كەلگەن سوڭ، اسكەري جاساق ءورتتى تۇتاس سوندىرگەنشە قاۋىپسىزدىكتى قاداعالادى.
«تۇرعىنداردى ەۆاكۋاتسيالاۋدا كورسەتكەن تاباندىلىعى مەن باتىل ارەكەتتەرى ءۇشىن اسكەري قىزمەتشىلەر العىس حاتتارمەن ماراپاتتالدى»، - دەپ حابارلادى ق ر ۇلتتىق ۇلان باسپا ءسوز قىزمەتى.