مينەرالدى تىڭايتقىشتار وندىرەتىن الەمدىك كومپانيا وڭتۇستىك قازاقستاندا بىرلەسكەن جوبالاردى اشۋعا نيەتتى
ەكى جاقتى كەزدەسۋ بارىسىندا تاراپتار اتالعان كومپانيا مەن وڭتۇستىك قازاقستان وبلىسىنىڭ اراسىنداعى ءوزارا ءتيىمدى جوبالاردى جۇزەگە اسىرۋدى ءسوز ەتتى. «ءۇش ميلليونعا جۋىق تۇرعىنى بار وڭتۇستىك اگرارلىق ايماق سانالادى. وبلىستا سوڭعى جىلدارى ونەركاسىپ پەن اۋىل شارۋاشىلىعى سالاسى جىلدان-جىلعا قارقىندى دامىپ كەلەدى. بۇدان بولەك، تاۋ-كەن سالاسىن يگەرۋدە دە تاجىريبەمىز مول. سوندىقتان بۇگىنگى كەزدەسۋدىڭ ماڭىزدىلىعى ەرەكشە»، - دەدى جانسەيىت قانسەيىت ۇلى.
و ق و اكىمدىگىنەن ءمالىم ەتكەندەي، «اكرون» كومپانياسى پرەزيدەنتىنىڭ كەڭەسشىسى يۆان انتونوۆ قازاقستان مەن رەسەي ەلى اراسىنداعى دوستىق جانە ەكونوميكالىق قارىم-قاتىناستىڭ جىلدان-جىلعا نىعايىپ كەلە جاتقانىن اتاپ ءوتتى. ول سونداي-اق «اكرون» كومپانياسىنىڭ قۇرامىنا رەسەيلىك ءىرى تاۋ-كەن بايىتۋ كومبيناتتارى كىرەتىندىگىن مالىمدەدى.
1967-جىلى قۇرىلعان كاسىپورىن بۇگىندە رەسەيدىڭ ءبىرقاتار وبلىستارىندا مينەرالدى ازوت جانە فوسفات تىڭايتقىشتارىن وندىرۋمەن جانە كۇرىش وسىرۋمەن اينالىسادى. «ءبىزدىڭ كومپانيا مينەرالدى تىڭايتقىشتار ازىرلەيتىن الەمدەگى ۇزدىك كاسىپورىندار قاتارىنا جاتادى. قازىرگى تاڭدا كەن ءوندىرىپ، ءتۇرلى حيميالىق تىڭايتقىشتار شىعارۋمەن اينالىساتىن كومپانيادا 12 مىڭعا جۋىق ازامات ەڭبەك ەتەدى. الداعى ۋاقىتتا وسى باعىتتاردا بىرلەسىپ جۇمىس ىستەۋگە نيەتتىمىز. وڭتۇستىك قازاقستان وبلىسىنا جاساعان ساپارىمىز ءساتتى اياقتالىپ، كەلەسى كەزدەسكەندە اۋقىمدى جوبالاردى ىسكە اسىرۋعا كەلىسىم جاسالاتىنىنا سەنىمدىمىن»، - دەدى يۆان انتونوۆ.
رەسەيلىك كومپانيا وكىلدەرى ءىس ساپار بارىسىندا وبلىستىڭ يندۋستريالدى ايماعىنداعى كاسىپورىنداردىڭ جۇمىسىمەن تانىساتىن بولادى.
ايتا كەتەيىك، رەسەي قازاقستاننىڭ ساۋدا سالاسىنداعى ءداستۇرلى ءىرى سەرىكتەسى بولىپ سانالادى. ءوزارا تاۋار اينالىمنىڭ ورتاشا جىلدىق كولەمى شامامەن 21 ميلليارد دوللاردى قۇرايدى. بۇگىندە قازاقستاندا رەسەيلىك كاپيتالدىڭ قاتىسى بار 6 مىڭنان استام كاسىپورىن جۇمىس ىستەيدى.