قىتايلىق ب ا ق: ديماش - قازاقستان- قىتاي مادەني ىنتىماقتاستىعىنىڭ كوپىرى

استانا. قازاقپارات - قىتايلىق HunanTV تەلەارناسى جاڭالىقتارىندا قازاقستاندىق ءانشى ديماشتى قازاقستان- قىتاي مادەني ىنتىماقتاستىعىنىڭ كوپىرى دەپ باعالادى.

«Singer2017 بايقاۋىنىڭ قازاقستان اتىنان قاتىسقان ديماش قۇدايبەرگەنوۆتىڭ جوباداعى جەڭىسى قازاقستانداعى قانداستارىنا قۋانىش سىيلادى. قازاقستاندىقتار قازاق مادەنيەتىنىڭ شەتەلگە تانىلۋىنا قۋانۋدا» - دەپ حابارلادى HunanTV تەلەارناسى.

HunanTV قازاقپاراتتىڭ ديماش تۋرالى جاڭالىقتارىنا شولۋ جاساپ، «قازاقستاندىق اقپارات قۇرالدارى تالانتتى ءانشىنىڭ قىتايداعى جەڭىس جولدارى تۋرالى قازاقستاندىقتارعا ۋاقىتىلى جەتكىزىپ وتىردى» - دەپ حابارلادى.

«ول قىتايدا وتە جاقسى ونەر كورسەتىپ، قىتايلىق كورەرمەندەردىڭ جوعارى باعاسىنا يە بولدى. الداعى جارىس جولىندا ساتتىلىك تىلەيمىن» - دەدى استانا قالاسىنىڭ تۇرعىنى HunanTV تىلشىسىنە.

Singer2017 ءان بايقاۋىنىڭ اتقارۋشى پروديۋسەرى حۋڭ شياۋ HunanTV تىلشىسىنە بەرگەن سۇحباتىندا «قازاقستان - جىبەك جولى بويىنداعى جەتەكشى ەلدەردىڭ ءبىرى. جوبا ارقىلى قازاقستاندىقتار تەلەارنامىزعا جانە Singer2017 ءان بايقاۋىنا نازار سالىپ وتىر. مەنىڭشە، بۇل قازاقستان- قىتاي مادەنيەتىن جاقىنداستىرا تۇسەدى» - دەدى.

«بايقاۋداعى جولىم تۋرالى كەسىپ ايتا المايمىن. ول بولاشاقتىڭ ەنشىسىندە. جەڭىسكە جەتۋگە تىرىسامىن» - دەپ ءوز ويىن ءبىلدىردى ديماش.

ەسكە سالا كەتەيىك، ديماش بۇعان دەيىن قىتايداعى Singer2017 ءان بايقاۋىنا قاتىسىپ، ءبىرىنشى جانە ەكىنشى كەزەڭىنىڭ باس جۇلدەسىن يەلەنگەن بولاتىن.

جەرلەسىمىز 4 اقپان كۇنى استانا ۋاقىتىمەن 20:30 دا بايقاۋدىڭ ءۇشىنشى كەزەڭىندە ونەر كورسەتەدى.

 

اۆتور: مۇحتار قاليموللا ۇلى