قازاقستاندىقتار قانداي جاعدايدا قۇجاتتاعى تەگىن وزگەرتە الادى

استانا. قازاقپارات - ادىلەت مينيسترلىگىنىڭ رەسمي وكىلى ولجاس رامازانوۆ جەكە پاراقشاسىندا قازاقستان ازاماتتارى قانداي جاعدايدا قۇجاتتاعى تەگىن وزگەرتە الاتىنىن جازدى، دەپ حابارلايدى قازاقپارات.

 ادىلەت مينيسترلىگىنىڭ وكىلى حابارلاعانداي، مىنانداي 13 سەبەپ بولسا، ادام قۇجاتتاعى تەگىن اۋىستىرا الادى ەكەن:

 1) اتى، اكەسىنىڭ اتى، تەگى وعاش ەستىلسە؛

 2) اتىن، اكەسىنىڭ اتىن، تەگىن ايتۋ تىلگە قيىن بولسا؛

 3) ەگەر نەكەنى مەملەكەتتىك تىركەۋ كەزىندە نەكەگە دەيىنگى تەكتەرىندە قالسا، جۇبايىمەن ورتاق تەكتە بولعىسى كەلگەن جۇبايدىڭ تىلەگى؛

 4) ەگەر نەكە بۇزىلعان كەزدە بۇل تۋرالى مالىمدەلمەسە، نەكەگە دەيىنگى تەگىن العىسى كەلسە؛

 5) بۇرىنعى نەكەدەن تۋعان بالالارىمەن ورتاق تەكتە بولعىسى كەلسە؛

 6) جۇبايى قايتىس بولعان جاعدايدا نەكەگە دەيىنگى تەگىن العىسى كەلسە؛

 7) جۇبايى قايتىس بولعان جاعدايدا ءوتىنىش بەرۋشى نەكەگە دەيىنگى تەگىندە بولعاندا، بالالارىمەن ورتاق تەكتە بولعىسى كەلسە؛

 8) ءوتىنىش بەرۋشى تاڭداعان اتا- انالارىنىڭ ءبىرىنىڭ ۇلتىنا (اتا- انالارىنىڭ ۇلتى ءارتۇرلى بولعان كەزدە) سايكەس كەلەتىن اتتى جانە (نەمەسە) تەكتى العىسى كەلسە؛

 9) قۇجاتتارداعى اتىنان وزگەشە، ومىردە ناقتى قالىپتاسقان اتىن العىسى كەلسە؛

 10) ەگەر نەكەگە وتىرعان (ەرلى- زايىپتى بولعان) كەزدە جۇبايىنىڭ تەگى قابىلدانسا، نەكەگە دەيىنگى تەگىن العىسى كەلسە؛

 11) ۇلتتىق داستۇرلەرگە بايلانىستى اكەسىنىڭ نەمەسە اتاسىنىڭ اتى بويىنشا تەك العىسى كەلسە؛

 12) ءوتىنىش بەرۋشىنى ءىس جۇزىندە تاربيەلەگەن ادامنىڭ تەگى مەن اتى بويىنشا تەكتى جانە اكەسىنىڭ اتىن العىسى كەلسە؛

 13) جىنىسىن حيرۋرگيالىق جولمەن وزگەرتكەن كەزدە تاڭداعان جىنىسقا سايكەس كەلەتىن اتتى، اكەسىنىڭ اتىن، تەكتى العىسى كەلسە قازاقستاندىقتار زاڭ بويىنشا تەكتەرىن اۋىستىرا الادى.

بۇل شارتتار «نەكە جانە وتباسى» تۋرالى كودەكستىڭ 257-بابىندا تولىعىمەن جازىلعان.

اۆتور: كەنجەكەي توقتامۇرات قىزى