دۋشانبەدە تاجىكستان قازاقتارى تۋرالى كىتاپ جارىققا شىقتى

استانا. قازاقپارات - دۋشانبەدە «تاجىكستان قازاقتارى» دەپ اتالاتىن كىتاپ جارىققا شىقتى.

ازاتتىق راديوسى تاجىك قىزمەتىنىڭ حابارلاۋىنشا، كىتاپ تاجىكستان قازاقتارىنىڭ ادەت- عۇرپى جانە بۇگىنگى سالتى جايىندا عىلىمي زەرتتەۋ بولىپ تابىلادى.

 تاجىك تىلىندەگى كىتاپتىڭ اۆتورى -  جەرگىلىكتى عالىم ءابدىساتتار نۇرعاليەۆ.

ونىڭ ايتۋىنشا، وسى ەلدەگى قازاقتاردىڭ ءومىرى مەن ادەت عۇرپى تاجىكستان تاريحىنىڭ اجىراماس ءبىر بولىگى بولىپ سانالۋى ءتيىس. ءابدىساتتار نۇرعاليەۆ جەرگىلىكتى قازاقتاردىڭ كەيبىرى سوۆەت وداعى كەزىندە تاجىكستاندا باسشىلىق قىزمەت اتقارعاندارىن، بۇگىندە ولاردىڭ وسى ەلدە تۇراتىن باسقا دا ۇلتتارمەن قاتار ءبىرقالىپتى ءومىر ءسۇرىپ جاتقانىن ايتادى.

160 بەتتەن تۇراتىن «تاجىكستان قازاقتارى» كىتابىنىڭ تارالىمى - 500 دانا.

كىتاپتا بۇگىنگى تاجىكستان جەرىندە قازاقتاردىڭ 500 جىلدان بەرى تۇراتىنى، ءبىراق ولاردىڭ كوپشىلىگى 1990 -جىلدارى اتامەكەنى قازاقستانعا كوشىپ كەتكەنى ايتىلادى. ءابدىساتتار نۇرعالييەۆتىڭ ايتۋىنشا، 1989 -جىلى تاجىكستاندا 12 مىڭ قازاق تۇرسا، بۇگىن ولاردىڭ سانى شامامەن ەكى مىڭدى قۇرايدى.

«تاجىكستان قازاقتارى» - پروفەسسور ءابدىساتتار نۇرعاليەۆتىڭ 24-كىتابى. ونىڭ قازاق ادەبيەتى جانە اباي تۋرالى تاجىك تىلىندە جازعان زەرتتەۋلەرى ىلگەرىدە جارىق كورگەن بولاتىن. جوعارى وقۋ ورنىن قازاقستاندا بىتىرگەن ءابدىساتتار نۇرعاليەۆ قازىر دۋشانبەدەگى رەسەي- تاجىكستان سلاۆيان ۋنيۆەرسيتەتىندە ساباق بەرەدى.

«ازاتتىق»