الدا كوكتەمنىڭ كەلە جاتقانىن ەسكەرسەك، ءالى تالاي شارۋا اتقارىلۋى كەرەك.
وسى ماسەلەگە قاتىستى قالا باسشىسى اسەت يسەكەشەۆ ەلوردا اكىمدىگىندە جيىن وتكىزىپ، سۋ تاسقىنىنىڭ الدىن الۋ شارالارىن پىسىقتادى. استانادا بۇرىن- سوڭدى بۇلاي قار كوپ جاۋماعان. بىلتىرعى ماۋسىمدا جينالعان قاردىڭ جالپى كولەمى 2,9 ميلليون تەكشە مەتردى قۇراعان. ال بيىل ءقازىردىڭ وزىندە 3 ميلليون تەكشە مەتر قار شىعارىلىپ قويدى.
بۇل - قازان ايىنىڭ 13 ىنەن بەرگى جۇمىستىڭ ەسەبى. قىستىڭ ءالى ءبىراز جاتاتىنىن ەسكەرسەك، شىعارىلاتىن قار 5-5,5 ميلليون تەكشە مەتردى شامالاۋى مۇمكىن. قىس باستالعالى ءۇزىلىسسىز قار كۇرەۋ جۇمىستارىنا 2,7 مىڭ ادام جۇمىلدىرىلىپ، مەحانيكالاندىرىلعان تازالىققا 2 مىڭ بىرلىكتەن استام ارناۋلى تەحنيكا تارتىلعان.
استانا اكىمى اسەت يسەكەشيەۆ قالا اۋا رايىنىڭ توسىن مىنەزىنە تاس-ءتۇيىن دايىن بولۋىن، ەڭ الدىمەن، كوكتەمگى سۋ تاسقىنىنىڭ الدىن الۋ كەرەكتىگىن اتاپ ايتتى. سوندىقتان سۋ باسۋ ءقاۋپى بار تۇرعىن الاپتارى، اسىرەسە، جەكە تۇرعىن سەكتورلارى ەرەكشە قاداعالانۋى قاجەت. جيىندا قالالىق كوممۋنالدىق شارۋاشىلىق باسقارماسىنىڭ باسشىسى تولەگەن زاكاريانوۆ 2017 -جىلى استانا قالاسىنىڭ اۋماعىندا كوكتەمگى سۋ تاسقىنىنىڭ الدىن الۋعا دايىندىق شارالارىنىڭ كەشەندى جوسپارى بەكىتىلگەنىن مالىمدەدى.
«اۋدان اكىمدەرىنە باسقارمالارمەن بىرگە تۇرعىن الاپتارىنىڭ، الەۋمەتتىك- مادەني- تۇرمىستىق نىسانداردىڭ، ءقوناقۇي كەشەندەرىنىڭ، قۇرىلىس الاڭدارىنىڭ جانە شوب نىساندارىنىڭ قارىن تازارتۋىن قاداعالاۋدى تاپسىرۋ قاجەت. كوممۋنالدىق شارۋاشىلىق باسقارماسى توتەنشە جاعدايلار دەپارتامەنتى جانە اۋدان اكىمدىكتەرىمەن بىرلەسە پروبلەمالىق ايماقتار انىقتاپ، سيتۋاتسيالىق سحەمانى ازىرلەدى»، - دەدى تولەگەن زاكاريانوۆ.
سونىمەن قاتار، كوممۋنالدىق شارۋاشىلىق باسقارماسىنىڭ باسشىسى قولعا الىنۋى كەرەك ءبىرقاتار شارالاردى اتادى. ول الدىمەن جاڭا تەمىرجول ۆوكزالى ايماعىنداعى جاعدايعا توقتالدى. بۇل ماڭايدا ەسىل وزەنىندە ارنا قۇرىلىسى اياسىندا سالىنعان 2 تەحنولوگيالىق وتپە جولدى الىپ تاستاۋ قاجەت، سونداي- اق، سۋ ءبولۋ بوگەتى سالىنىپ جاتقان ايماقتا تاسقىن سۋلاردىڭ وتكىزگىشتىگىن ارتتىرۋ ماقساتىندا سۋ وتكىزۋ كانالىن كەڭەيتكەن دۇرىس. وعان قوسا، مايبالىق وزەنىنىڭ ارناسىن 6 مەترگە دەيىن كەڭەيتىپ، سول جاعالاۋداعى بوگەتتەردى نىعايتۋ كەرەك جانە ەسىل وزەنىنىڭ ارناسىن ۇلعايتقان ءجون. گيدروتەحنيكالىق قۇرىلىستار جۇرگىزۋدى باستاۋ مەن وزەن ارنالارىن تازارتۋ دا ماڭىزدى.
قازىر ەلوردالىق توتەنشە جاعدايلار دەپارتامەنتىنىڭ ماماندارى جەرگىلىكتى اتقارۋشى ورگاندارمەن بىرلەسىپ، سۋ باسۋ قاۋپى بار ايماقتاردى ارالاۋعا كىرىسىپ كەتتى. تۇرعىندارعا جەكە مەنشىگىندەگى اۋماقتى تاسقىننان ساقتاندىرۋدىڭ قاراپايىم جولى - اۋلالارىنداعى جانە ۇيلەرىنىڭ شاتىرىنداعى قارلاردى ۋاقىتىلى تازارتۋ ەكەنى ءتۇسىندىرىلدى. ايماقتاردى ارالاۋ بارىسىندا كىشى تالدىكولدە جينالعان سۋلاردى بۇرىپ اعىزىپ جىبەرۋ جانە تۇران داڭعىلىنىڭ بويىمەن بوگەت كوتەرۋ جاعى قاراستىرىلدى. ماماندار اتالعان شارالار سۋ تاسقىنى كەزەڭىندە توتەنشە جاعدايلاردى رەتتەۋگە سەپتىگىن تيگىزەتىنىنە سەنىمدى.
كۇن ناقتى قاي ۋاقىتتا جىلىناتىنى بەلگىسىز بولعاندىقتان، ەلوردا اكىمى اياق استىنان سۋ باسۋ قاۋپىنىڭ تۋىنداۋىن جانە قاردىڭ كۇرت ەرۋىن ەسكەرۋ كەرەكتىگىن جەتكىزدى. ونىڭ ايتۋىنشا، اعىمداعى جىلى سۋ تاسقىنىنا قارسى شارالارعا الداعى ەكسپو كورمەسىنە ءمان بەرە وتىرىپ، بيۋدجەتتەن 1,3 ميلليارد تەڭگە قاراستىرىلدى.
«ءبىز الدىمىزداعى كوكتەمگى سۋ تاسقىنىنا بارىنشا دايىندالۋىمىز كەرەك. سوندىقتان سۋدىڭ كوتەرىلىپ، تۇرعىن ۇيلەر مەن باسقا نىسانداردى سۋ باسۋىنا جول بەرمەۋ ءۇشىن تاسقىنعا قارسى جوسپاردى ناقتىلاپ، ءىس- شارالاردى قارجىلاندىرۋمەن قامتۋدى ۇسىنامىن. تاسقىنعا جانە باسقا دا توتەنشە جاعدايلارعا تاس- ءتۇيىن دايىن بولۋىمىز ءۇشىن اتقارىلۋى كەرەك ءىستىڭ ءبارىن جاساۋعا ءتيىسپىز»، - دەدى اسەت يسەكەشيەۆ.
دەرەككوز: «استانا اقشامى» گازەتى (ورىنبەك وتەمۇرات)